ការមកដល់នៃវ៉ាក់សាំង AstraZeneca ផលិតនៅប្រទេសជប៉ុនដែលជាជំនួយរបស់រដ្ឋាភិបាលជប៉ុនជាផ្នែកមួយ នៃកិច្ចខិតខំប្រឹងប្រែងរបស់រដ្ឋាភិបាលជប៉ុន ក្នុងការប្រយុទ្ធប្រឆាំងនឹងការឆ្លងកូវីដ១៩នៅលើសកលលោក កាលពីខែមុន រដ្ឋាភិបាលជប៉ុនបានប្រកាសថានឹងផ្តល់ជូនព្រះរាជាណាចក្រកម្ពុជានូវ វ៉ាក់សាំងAstraZeneca ដែលត្រូវបានអនុញ្ញាតិឲ្យប្រើប្រាស់ដោយអង្គការសុខភាពពិភពលោក(WHO EUL) និងបានផលិតនៅក្នុងប្រទេសជប៉ុនចំនួនប្រមាណ៣០ម៉ឺនដូស។ វ៉ាក់សាំងទាំងនេះបានមកដល់ប្រទេស កម្ពុជានៅថ្ងៃទី១៩ខែធ្នូ។ ការសម្រេចផ្តល់វ៉ាក់សាំងទាំងនេះត្រូវបានធ្វើឡើងដោយផ្អែកលើចំណងមិត្តភាពរវាងប្រទេសជប៉ុន និងប្រទេសកម្ពុជា ព្រមទាំងស្ថានភាពបច្ចុប្បន្នរបស់ពិភពលោក ជាពិសេសការលេចចេញនូវវីរុសកូវីដ-១៩បម្លែងថ្មី។
ការបរិច្ចាកនេះ គឺពីរដ្ឋាភិបាលជប៉ុន ជូនដល់រាជរដ្ឋាភិបាលកម្ពុជា ធ្វើឡើងក្រោមកិច្ចសហប្រតិបត្តិការជាមួយ COVAX Facility និងគាំទ្រដោយយូនីសេហ្វ(UNICEF) និងអង្គការសុខភាពពិភពលោក(WHO)។
ប្រឈមមុខនឹងការរីករាលដាលនៃមេរោគឆ្លងថ្មីក្នុងកំឡុងពេលបច្ចុប្បន្ននេះ ការចាក់វ៉ាក់សាំង ការពង្រឹងប្រព័ន្ធសុខាភិបាល និងការកែលម្អការថែទាំវេជ្ជសាស្ត្រពិតជាមានភាពចាំបាច់ណាស់។ ក្នុងកិច្ចពិភាក្សាទូទៅនៃសម័យប្រជុំលើកទី៧៦ នៃមហាសន្និបាតអង្គការសហប្រជាជាតិ រដ្ឋាភិបាលជប៉ុនបានសន្យាថានឹងបរិច្ចាកវ៉ាក់សាំងទ្វេដងពីប្រមាណ៣០លានដូសដល់ប្រមាណ៦០លានដូស។ បន្ថែមពីនេះ ប្រទេសជប៉ុនក៏បានសន្យាផ្តល់ថវិកាចំនួន ១ ពាន់លានដុល្លារដល់ COVAX Facility ផងដែរ។ មកទល់ពេលនេះ ក្នុងបរិបទនៃកិច្ចសហប្រតិបត្តិការទ្វេភាគីដើម្បីទប់ទល់នឹងជម្ងឺកូវីដ១៩ ជាមួយនិងការគាំទ្រពីដៃគូរបស់យើងគឺ យូនីសេហ្វ (UNICEF) និងចៃកា (JICA) រដ្ឋាភិបាលជប៉ុនបានផ្តល់ជំនួយជាច្រើមរួមមាន ការផ្ដល់ឧបករណ៍បរិក្ខារពេទ្យ ការកែលម្អមន្ទីរពេទ្យ ការគាំទ្រវិធានការទប់ស្កាត់ការចម្លងជម្ងឺតាមព្រំដែន និងការផ្គត់ផ្គង់ឧបករណ៍ប្រព័ន្ធត្រជាក់ជាដើម។
រដ្ឋាភិបាលជប៉ុនក៏បានបានផ្ដល់ជាកម្ចីប្រមាណ ២២៧លានដុល្លារអាមេរិក ដែលត្រូវបានយកទៅប្រើប្រាស់ក្នុងការគាំទ្រហិរញ្ញវត្ថុដល់ប្រជាជនដែលរងផលប៉ះពាល់ដោយសារកូវីដ១៩ និងសម្រាប់ការពង្រឹងប្រព័ន្ធសុខាភិបាល។
ប្រទេសជប៉ុន នឹងបន្តកិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងការផ្តល់នូវឧបករណ៍ បរិក្ខារចាំបាច់។ យើងសង្ឃឹមថាការផ្គត់ផ្គង់ទាំងនេះ នឹងអាចជួយគាំទ្រដល់កិច្ចខិតខំប្រឹងប្រែង របស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងជាមួយនឹងជម្ងឺកូវីដ១៩ ក៏ដូចជាអាចបន្ធូរបន្ថយក្តីកង្វល់មួយចំនួនរបស់ប្រជាជនកម្ពុជា៕
![](https://i0.wp.com/domneng.news/wp-content/uploads/2021/12/269500875-4453032138158023-3245891075594755899-n.jpg?resize=1000%2C668&ssl=1)
![](https://i0.wp.com/domneng.news/wp-content/uploads/2021/12/269744705-4453031814824722-3901886443837394116-n.jpg?resize=1000%2C668&ssl=1)
![](https://i0.wp.com/domneng.news/wp-content/uploads/2021/12/269743104-4453031794824724-1409366607118475137-n.jpg?resize=1000%2C668&ssl=1)
![](https://i0.wp.com/domneng.news/wp-content/uploads/2021/12/269704717-4453031818158055-7495890162872626932-n.jpg?resize=1000%2C668&ssl=1)
![](https://i0.wp.com/domneng.news/wp-content/uploads/2021/12/269600862-4453030531491517-6244738866625089239-n.jpg?resize=1000%2C668&ssl=1)
មតិយោបល់