(វ៉ាស៊ីនតោន)៖ ទីក្រុងវ៉ាស៊ីនតោន មានការព្រួយបារម្ភជាខ្លាំងជុំវិញការបង្កើនការធ្វើតេស្ដមីស៊ីលជាបន្តបន្ទាប់ របស់កូរ៉េខាងជើង ដ្បិតវាអាចនឹងនាំទៅរក
ការធ្វើតេស្ដអាវុធនុយក្លេអ៊ែរ និងមីស៊ីលបាលិស្ទីគអន្តរទ្វីប (ICBM) ឡើងវិញ។ នេះបើតាមមន្ត្រីជាន់ខ្ពស់អាមេរិកម្នាក់។

ឆ្លើយតបទៅនឹងសំណួរដែលសួរថា តើអាមេរិកមានការព្រួយបារម្ភថាទីក្រុងព្យុងយ៉ាងអាចនឹងធ្វើតេស្ដអាវុធនុយក្លេអ៊ែរ និងមីស៊ីល ICBM ដែរឬក៏យ៉ាងណា? មន្ត្រីរូបនេះដដែលបានបញ្ជាក់ថា «ជាការពិតណាស់, យើងពិតជាមានការព្រួយបារម្ភ… ហើយយើងមិនចង់ឃើញការធ្វើតេស្ដរបៀបនេះទៀតទេ ដូច្នេះយើងអំពាវនាវឱ្យកូរ៉េខាងជើង បញ្ឈប់ការធ្វើតេស្ដទាំងនេះតទៅទៀត»។

កូរ៉េខាងជើង នៅថ្ងៃច័ន្ទនេះដែរ បានចេញមុខអះអាងថាមីស៊ីលដែលខ្លួនបានធ្វើតេស្ត កាលពីថ្ងៃអាទិត្យម្សិលមិញនេះមានឈ្មោះថា វ៉ាសុង ១២ (Hwasong-12) ជាប្រភេទមីស៊ីលបាលីស្ទីករយ:ចម្ងាយមធ្យម (IRBM) ហើយក៏ជាមីស៊ីលរយ:ចម្ងាយឆ្ងាយដែលទីក្រុងព្យុងយ៉ាង បានធ្វើតេស្ដជាលើកដំបូង បំផុតផងដែរចាប់តាំងពីឆ្នាំ២០១៧មក និងជាលើកទី៧ នៅក្នុងខែមករានេះ។

បើតាមយោធាកូរ៉េខាងត្បូងមីស៊ីលបាលិស្ទីគខាងលើ ត្រូវបានកូរ៉េខាងជើងបាញ់សាកល្បងនៅម៉ោង ៧៖៥២នាទី ថ្ងៃអាទិត្យម្សិលមិញ ចេញពីខេត្តចាហ្គាំង (Jagang) ឆ្ពោះទៅកាន់តំបន់សមុទ្រនៃឆ្នេរភាគខាងកើតនៃប្រទេស។

ដោយឡែក បើតាមនាយកខុទ្ទការល័យរដ្ឋាភិបាលជប៉ុន លោក Hirokazu Matsuno មីស៊ីលដែលកូរ៉េខាងជើងបានតេស្ដ ត្រូវបានក្រុមអ្នកជំនាញវាយតម្លៃថា បានហោះដល់រយ:កម្ពស់ ២,០០០គីឡូម៉ែត្រ និងហោះបានរយ:ពេល៣០នាទី ព្រមទាំងធ្លាក់នៅ ចម្ងាយ ៨០០គីឡូម៉ែត្រ ពីទីតាំងបាញ់ចេញ៕

ប្រភព៖​​​​​​ Reuters