ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ស្នើឱ្យមានការតែងតាំងបងប្អូនឥស្លាម សម្រាប់បណ្ដាខេត្តដែលមានបងប្អូនឥស្លាមរស់នៅច្រើន ជាអភិបាលរងខេត្ត ស្រុក ក្រុង ខណ្ឌ ដើម្បីងាយសម្រួលនៅក្នុងការធ្វើទំនាក់ទំនងក្នុងសហគមន៍ ហើយដែលជាផ្នែកមួយនៃសុខដុមរមនាក្នុងចំណោមជាតិសាន៍របស់យើងផងដែរ។
ក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២១ និងលើកទិដៅការងារឆ្នាំ២០២២ របស់ក្រសួងមហាផ្ទៃ នារសៀលថ្ងៃទី ២៣ ខែកុម្ភ: ឆ្នាំ២០២២ នៅសណ្ឋាគារសុខា រាជធានីភ្នំពេញ សម្ដេចតេជោ ហ៊ុន សែន បានគូសបញ្ជាក់ទៅកាន់ថ្នាក់ដឹកនាំក្រសួងមហាផ្ទៃ ក៏ដូចជាថ្នាក់ដឹកនាំរាជធានី ខេត្ត ទៅលើការតែងតាំងមន្ត្រីថា ដោយកន្លងទៅយើងបានខិតខំរៀបចំឱ្យមានមន្ត្រីជនជាតិភាគតិចរបស់យើង នៅតំបន់ឦសាន និងនៅខេត្តកោះកុង។ ប៉ុន្តែបញ្ហាមួយដែលសម្ដេចស្នើឱ្យយកចិត្តទុកដាក់នោះ គឺទាក់ទងជាមួយនឹងស្ថានភាពបោះចម្រុះនៅផ្នែកខាងក្នុង ដែលមានបងប្អូនឥស្លាមរស់នៅយ៉ាងច្រើននៅតាមបណ្ដាខេត្តនិងស្រុកមួយចំនួន។ សម្ដេចតេជោបានថ្លែងបញ្ជាក់ថា «ខ្ញុំស្នើឱ្យបណ្ដាខេត្តដែលមានបងប្អូនឥស្លាមរស់នៅ យកចិត្តទុកដាក់រៀបចំ ដើម្បីឱ្យមានហោចណាស់អភិបាលរងមួយនាក់ជាជនជាតិឥស្លាម នៅក្នុងខេត្តដែលមានប្រជាជនច្រើន ហើយបើអាចធ្វើទៅបាន បើមានសមត្ថភាពថែមទៀតនោះ គឺធ្វើអភិបាលស្រុក ឬខណ្ឌ ដែលមានបងប្អូនឥស្លាមច្រើន»។ សម្ដេចតេជោថ្លែងបន្ដថា នេះមិនមែនជាកូតាទេ តែជាបញ្ហាទាក់ទិនជាមួយនឹងគោលនយោបាយរបស់រាជរដ្ឋាភិបាល និងសម្រួលដល់ការធ្វើការងារ។ សម្ដេចតេជោបានលើកឡើងថា ចាប់ផ្ដើមតាំងពីយើងផ្ទេរការងារពីថ្នាក់ជាតិ ទៅឱ្យថ្នាក់ក្រោមជាតិ កិច្ចការថ្នាក់ក្រោមជាតិកាន់តែច្រើន។ ដូច្នេះហើយបានគណ:អចិន្ត្រៃយ៍គណបក្សប្រជាជនកម្ពុជាបានសម្រេចប្រគល់ភារកិច្ចជូនសម្ដេចក្រឡាហោម ដើម្បីធ្វើវិសោធនកម្មច្បាប់ទាក់ទងជាមួយនឹងការបង្កើននូវចំនួនអាសន:សម្រាប់គណ:អភិបាលខេត្ត រាជធានី គណ:អភិបាលក្រុង ស្រុក ខណ្ឌ ផងដែរ។ ដូច្នេះ សម្ដេចតេជោស្នើឱ្យយកចិត្តទុកដាក់ពិនិត្យ ស្រុកណាដែលមានជនជាតិឥស្លាមរស់នៅ គប្បីមានអភិបាលរងម្នាក់នៅក្នុងស្រុកនោះ ឬខណ្ឌនោះ។ ធ្វើយ៉ាងដូច្នេះ គឺយើងងាយសម្រួលនៅក្នុងទំនាក់ទំនងបែបសហគមន៍ ហើយវាដែលជាផ្នែកមួយនៃសុខដុមរមនាក្នុងចំណោមជាតិសាន៍របស់យើង។ សម្ដេចតេជោក៏បានអំពាវចំពោះនិស្សិត ក៏ដូចជាមន្ត្រី ដែលជាជនជាតិឥស្លាមយកចិត្តទុកដាក់ពង្រឹងសមត្ថភាព។ សម្ដេចតេជោនាយករដ្ឋមន្ត្រី ក៏បានស្នើឱ្យបណ្ដាខេត្តដែលមានបងប្អូនឥស្លាម ពិនិត្យរៀបចំ ថាតើស្រុកប៉ុន្មាននៅក្នុងខេត្តរបស់ខ្លួនដែលគប្បីត្រូវរៀបចំ ហើយលើកសំណើនេះមកកាន់ក្រសួងមហាផ្ទៃ ដើម្បីពិនិត្យលក្ខណ:សម្បត្តិតែងតាំងមន្ត្រីទាំងនោះនៅពេលក្រោយ។ សម្ដេចតេជោថ្លែងបន្ថែមឱ្យដឹងថា ខេត្តដែលមានបងប្អូនឥស្លាមរស់នៅច្រើន រួមមាន ខេត្តកំពង់ចាម ខេត្តក្រចេះ ខេត្តកំពង់ធំ ខេត្តកំពង់ឆ្នាំង ខេត្តពោធិ៍សាត់ ខេត្តកំពត និងរាជធានីភ្នំពេញក្នុងខណ្ឌមួយចំនួន។ល។
សម្ដេចតេជោគូសបញ្ជាក់បន្ថែមថា យើងធ្វើបែបនេះគឺងាយស្រួល ឧទាហរណ៍ថា បញ្ហាកើតឡើងក្នុងតំបន់ឥស្លាមរស់នៅ អ្នកដែលធ្វើការងារសម្របសម្រួលនៅទីនោះគឺឥស្លាមនោះឯង ដែលចាំបាច់ត្រូវចេញមុខមុនគេធ្វើការដោះស្រាយអំពីបញ្ហានេះ៕
មតិយោបល់