ភ្នំពេញ ៖ បុរសជាជនជាតិចិនម្នាក់ បានបើករថយន្តម៉ាកlexusRX330 បានបើកបត់បញ្រ្ចាសផ្លូវ ជ្រុលទៅបុកម៉ូតូឌ្រីមសង់ ជិះដោយយុវជន៣នាក់ ចំពីមុខពេញទំហឹង ប៉ើងទៅមុខជាច្រើនម៉ែត្រ បណ្តាលឲ្យដួលរងរបួសធ្ងន់ស្រាល ត្រូវបានរថយន្តសាមុយ ដឹកយកទៅសង្រ្គោះបន្ទាន់ភ្លាមៗ។

ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ២និង ៥០នាទីរំលងអធ្រាត្រឈានចូលថ្ងៃទី ២៤ ខែកុម្ភៈ ឆ្នាំ២០២២ ដែលស្ថិតនៅតាមបណ្ដោយផ្លូវ១៩៨៦ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
យោងតាមប្រភពព័ត៌មានពីពលរដ្ឋ នៅកន្លែងកើតហេតុ បានប្រាប់ឱ្យដឹងថា មុនកើតហេតុគេបានឃើញយុវជន ៣នាក់ជិះម៉ូតូម៉ាកហុងដាឌ្រីមសង់ សេ១២៥ស៊េរីឆ្នាំ២០១៥ ពណ៌ខ្មៅមួយគ្រឿងពាក់ផ្លាកលេខកំពង់ចាម 1N-8466 ជិះតាមបណ្តោយផ្លូវ ១៩៨៦ ក្នុងទិសដៅពីកើតមកលិចក្នុងល្បឿនមធ្យម ខណៈមកដល់ចំណុចកើតហេតុខាងលើ ស្រាប់តែមានរថយន្តបង្កម៉ាក lexus RX330 បើកបរដោយបុរសជនជាតិចិន បើកបញ្ច្រាសគ្នា ពីលិចមកកើតក្នុងល្បឿនលឿន បានជ្រុលទៅបុ.កម៉ូតូចំពីមុខពេញទំហឹងប៉ើង នៅមុខជាច្រើនម៉ែត្រ បណ្តាលឲ្យជនរងគ្រោះ ដួលរងរបួសធ្ងន់និងស្រាល ចំណែកតៃកុងរថយន្តត្រូវសមត្ថកិច្ចឃាត់ឲ្យនៅកន្លែងកើតហេតុ។

បន្ទាប់ពីកើតហេតុខាងលើសមត្ថកិច្ចមូលដ្ឋាន ទំនាក់ទំនងទៅផ្នែកជំនាញចរាចរណ៍ ចុះមកដល់រួចវាយករថយន្តបង្កនិងម៉ូតូរងគ្រោះ ទៅរក្សាទុកនៅអធិការដ្ឋានខណ្ឌសែនសុខ រងចាំឲ្យភាគីទាំងពីរដោះស្រាយគ្នានៅពេលក្រោយ៕