(ហ្សាកាតា)៖ ប្រធានាធិបតីឥណ្ឌូណេស៉ី លោក ចូកូ វីដូដូ (Joko Widodo) បាននិយាយថា សង្រ្គាមនៅអ៊ុយក្រែន ត្រូវតែបញ្ចប់ដោយសារវាកំពុងជំរុញឲ្យ តម្លៃម្ហូបអាហារ និងថាមពលកើនឡើង ដែលនេះធ្វើឲ្យប្រទេសកំពុងអភិវឌ្ឍន៍ដូចជាឥណ្ឌូណេស៉ី ប្រឈមមុខនឹងហានិភ័យ។

ក្នុងបទសម្ភាន៍ជាមួយទូរទស្សន៍ CNBC លោក វីដូដូ បានថ្លែងថា «អ្វីដែលសំខាន់បំផុតដែលខ្ញុំបារម្ភនោះ គឺបញ្ហាតម្លៃម្ហូបអាហារ។ ដូច្នេះយើងចង់ឲ្យសង្រ្គាម ត្រូវបានបញ្ចប់, ដោះស្រាយតាមរយ:ការចរចា ដើម្បីឲ្យយើងអាចផ្តោតលើដំណោះស្រាយបញ្ហាសេដ្ឋកិច្ច»។ លោក វីដូដូ បានបន្ថែមថាប្រសិនបើមិនដូច្នោះ ទេ, វាមានគ្រោះថ្នាក់ណាស់សម្រាប់ប្រទេសនានា ជាពិសេសប្រទេសកំពុងអភិវឌ្ឍន៍ ហើយលោកក៏បានអំពាវនាវឲ្យបញ្ចប់សង្រ្គាមរុស្ស៉ី-អ៊ុយក្រែន និងដោះស្រាយតាមរយ:កិច្ចសន្ទនាផងដែរ។

លោក ចូកូ វីដូដូ នឹងត្រូវចូលរួមកិច្ចប្រជុំកំពូលក្រុមប្រទេសមានសេដ្ឋកិច្ចរីកចម្រើន ហៅកាត់ថា G7 តាមការអញ្ជើញរបស់ប្រទេសអាល្លឺម៉ង់ ចាប់ពីថ្ងៃទី២៦ ខែមិថុនា ដល់ថ្ងៃទី២៨ ខែមិថុនា។ បើតាមសារព័ត៌មានរុស្ស៉ី Tass លោក វីដូដូ រំពឹងថានឹងជួបជាមួយលោក ពូទីន នៅថ្ងៃទី៣០ ខែមិថុនា ខាងមុខនេះ៕

ប្រភព៖​​​​​​ CNBC