ផ្ទះ ព័ត៌មានជាតិ សមត្ថកិច្ច ឃា...

សមត្ថកិច្ច ឃាត់ខ្លួនជនសង្ស័យម្នាក់ រួមនិងថ្នាំញៀន២៣កញ្ចប់

0

ភ្នំពេញ: ជនសង្ស័យម្នាក់ រួមនឹងវត្ថុតាងថ្នាំញៀន២៣កញ្ចប់ ត្រូវបាននគរបាលផ្នែកយុត្តិធម៌ នៃអធិការដ្ឋាននគរបាលខណ្ឌទួលគោក សហការជាមួយ​នគរបាលមូលដ្ឋានបឹងកក់ទី២ធ្វើការឃាត់ខ្លួន កាលពីវេលាម៉ោង១១ និង៣០យប់ ថ្ងៃទី ១៣ខែកញ្ញា ឆ្នាំ២០១៦នេះ នៅចំណុចប្លុក អតីតរោងចក្រឆ្នាំងក្បែរផ្ទះសំណា​ក់​ស្រែលាភ ផ្លូវ៦០៨ ក្រុម១០៦ ភូមិ២៣ សង្កត់បឹងកក់ទី២ ខណ្ឌទួលគោក រាជធានីភ្នំពេញ ។

ជនសង្ស័យដែលសមត្ថកិច្ចចាប់ខ្លួនបានខាងលើនេះ មានឈ្មោះ រស់ វាសនា ហៅ ពេជ្រ ជឺរ៉ូ ភេទប្រុស អាយុ៣៧ឆ្នាំ មុខរបរមិនពិតប្រាកដ ស្នាក់នៅផ្ទះលេខ៣៨ ផ្លូវរថ​ភ្លើង ក្រុមទី១០៧ ភូមិ២៣ សង្កាត់បឹងកក់ទី២ ខណ្ឌទួល គោក រាជធានីភ្នំពេញ ។

ក្នុងនោះដែរ សមត្ថកិច្ចដកហូតបានក្រាមពណ៌ស ថ្លាសង្ស័យជាសារធាតុញៀនចំនួន២៣កញ្ចប់ ក្នុងនោះមានតូច២២កញ្ចប់ និងកញ្ចប់ធំចំនួន០១,ទូរស័ព្ទដៃចំនួន០២​គ្រឿង​ម៉ាកណូគា N ចុចពិលពណ៌ក្រហម ,កូនកាបូបដៃពណ៌លឿងចាស់ចំនួន០១ និងម៉ូតូចំនួន១គ្រឿង ម៉ាកវីវ៉ា ពណ៌ខ្មៅ ពាក់ស្លាកលេខ កំពង់ធំ 1E-1483 ។

នគរបាលព្រហ្មទណ្ឌខណ្ឌទួលគោក បានឲ្យដឹងថា នៅមុននឹងឈានដល់ការចាប់ឃាត់ខ្លួនជនសង្ស័យខាងលើនេះ កម្លាំងក្រុមល្បាតសហការជាមួយផ្នែកយុត្តិធម៌​ចុះល្បា​ត​ក្នុងភូមិសាស្ត្រ លុះបានមកដល់ចំណុចកើតហេតុ ក៏ជួបប្រទះជនសង្ស័យកំពុងឈរលក់គ្រឿងញៀនជាក់ស្តែង ដកហូតបានឃើញគ្រឿងញៀនចំនួន ២២កញ្ចប់តូច និង​០១កញ្ចប់ធំ ដែលជនសង្ស័យបានដាក់នៅក្នុងកូនកាបូបដៃពណ៌លឿងចាស់ទើបសមត្ថកិច្ច ធ្វើការឃាត់ខ្លួន រួមទាំងវត្ថុតាង នាំយកមកអធិការដ្ឋានធ្វើការសាកសួរតែម្តង ។

លុះព្រឹកឡើងនៅថ្ងៃទី១៤ ខែកញ្ញានេះ កម្លាំងព្រហ្មទណ្ឌនិងនគរបាលមូលដ្ឋាននាំខ្លួនជនសង្ស័យចុះទៅឆែកឆេរនៅផ្ទះជនល្មើស ជាលទ្ធផលមិនបានរកឃើញថ្នាំញៀន​ទៀតនោះទេ ។

បច្ចុប្បន្ន ជនសង្ស័យរួម និងថ្នាំញៀនត្រូវបានឃាត់ខ្លួនជាបណ្ដោះ អាសន្ននៅអធិការដ្ឋាននគរបាល ខណ្ឌទួលគោក ដើម្បីសាកសួរ និងកសាងសំណុំរឿង បញ្ជូនទៅសាលា​ដំបូងរាជ​ធានីភ្នំពេញ ចាត់ការតាមផ្លូវច្បាប់ ៕

គ្រឿងញៀន

មតិយោបល់

Loading...