កំពង់ឆ្នាំង: រថយន្តធុនធំដឹកដី ជាច្រើនគ្រឿងរបស់ក្រុមហ៊ុនមួយ គ្មានច្បាប់ទម្លាប់ត្រឹមត្រូវត្រូវបានកម្លាំងចម្រុះធ្វើការត្រួតពិនិត្យនិងឃាត់មិនឲ្យដំណើរការតទៅទៀត ខណ:ដែលក្រុមរថយន្តដឹកដីនេះ មិនសហការជាមួយសមត្ថកិច្ចចម្រុះ ។
ប្រតិបត្ដិការនេះ ធ្វើឡើងនៅវេលាម៉ោង៨និង៣០នាទី ថ្ងៃទី១៩កញ្ញា២០១៦ ចំណុចជើងភ្នំមួយក្នុងភូមិអណ្តូងឫស្សី ឃុំស្រែថ្មី ស្រុករលៀប្អៀរ ខេត្តកំពង់ឆ្នាំង មានការចូលរួមពីសមត្ថកិច្ចចម្រុះ មានមន្ទីរឧស្សាហកម្មរ៉ែ និងថាមពលខេត្ត មន្ទីរសាធារណការ និងដឹកជញ្ជូនខេត្ត នគរបាលខេត្តកងរាជអាវុធហត្ថខេត្ត រួមនឹងអាជ្ញាធរមូលដ្ឋាន ។
លោកអ៊ុក រស ប្រធានមន្ទីររ៉ែនិងថាមពលខេត្តកំពង់ឆ្នាំង បានឲ្យដឹងថា ក្រោយពីបានទទួលព័ត៌មានថា មានគ្រឿងចក្រកំពុងជីកគាស់កកាយរុករានយកអាចម៍ដី ដាក់លើរថយន្តធុនធំ ដឹកដីរបស់ក្រុមហ៊ុនមួយ ចូលមកធ្វើសកម្មភាពនៅក្នុងតំបន់ខាងលើដោយគ្មានច្បាប់អនុញ្ញាតដោយជ្រកក្រោមស្លាកជួសជុលកែលំផ្លូវលំនៅម្តុំឈ្វាំង ហើយមានសុទ្ធតែរថយន្តធុនធំមានដាក់ស្លាកសុទ្ធក្រសួងការពារជាតិនាយកដ្ឋានវិស្វកម្ម ។
ជុំវិញការស្រាវជ្រាវរបស់មន្ទីរសាធារណការខេត្តថាមិនបានទទួលពាក្យគម្រោងធ្វើផ្លូវណាមួយនោះទេ តែក្រុមរថយន្តដឹកដីនេះ មិនបានសហការជាមួយកម្លាំងសមត្ថកិច្ចចម្រុះនោះឡើយ គេឆ្លើយថា សោរថយន្តត្រូវបានមេការយកទៅជាមួយអស់ហើយតែក្រុមរថយន្តដឹកដីធុនធំ ទាំងអស់ខាងលើនេះ តែងតែធ្វើសកម្មភាពដឹកដីចាក់នៅតំបន់ផ្សេងៗ ដោយជ្រកក្រោមគម្រោងណាមួយច្បាស់លាស់នោះឡើយ ហើយគេធ្វើស្រេចតែចិត្ត ។
តែទោះជាយ៉ាងណាក៏កម្លាំងចម្រុះរបស់ខេត្តបាន ធ្វើកំណត់ហេតុលើរថយន្តធុនធំដឹកដីទាំងអស់ ឲ្យផ្អាកសកម្មភាពដឹកជញ្ជូន ដោយត្រូវចូលខ្លួនធ្វើការដោះស្រាយជាមួយសមត្ថកិច្ចជំនាញនិងអាជ្ញាធរខេត្តជាមុនសិន។ សកម្មភាពដឹកដីរបស់ក្រុមហ៊ុន អត់ច្បាប់នេះ បានបំផ្លាញផ្លូវជាតិលេខ៥៣ ហើយកន្លងមក ក្រុមរថយន្តខាងលើនេះធ្វើសកម្មភាពដឹកបំផ្លាញផ្លូវក្នុងខេត្តខ្ទេចខ្ទី ដោយសារ រថយន្តដឹកហួសចំណុះ និងមិនសហការជាមួយសមត្ថកិច្ចយើងនោះឡើយ៕
មតិយោបល់