ភ្នំពេញ: លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន បានជួបពិភាក្សាការងារជាមួយ លោក Tatsuyuki Sakurai ប្រធានក្រុមអ្នកស្ទង់មតិអង្គការ JICA សម្រាប់ការត្រៀមរៀបចម្ការស្ទង់មតិ លើគម្រោងផ្លូវល្បឿនលឿនពី រាជធានីភ្នំពេញ-ក្រុងបាវិត។ នេះបើយោងតាមក្រសួងសាធារណការ និងដឹកជញ្ជូន។

នៅក្នុងកិច្ចពិភាក្សា នៅថ្ងៃទី២៦ ខែកញ្ញា ឆ្នាំ២០១៦ លោក Sakurai បានជម្រាបជូនលោកទេសរដ្ឋមន្រ្តី អំពីគម្រោងនេះដោយបង្ហាញនូវលទ្ធផល បឋមនៃការស្ទង់មតិ និងបានស្នើសុំអនុសាសន៍ និងដំបូន្មានពី លោកទេសរដ្ឋមន្រ្តី ដោយផ្អែកលើលទ្ធផលស្ទង់មតិនានា។

លោកទេសរដ្ឋមន្រ្តី ស៊ុន ចាន់ថុល ក៏បានសម្តែងនូវការកោតសរសើរ ចំពោះក្រុមអ្នកស្ទង់មតិ ដែលបានបរិយាយយ៉ាងល្អិតល្អន់អំពីគម្រោងផែនការនេះ។ លោកបានកត់សម្គាល់អំពីសារ:សំខាន់ នៃការសាងសង់ផ្លូវល្បឿនលឿនពី រាជធានីភ្នំពេញទៅក្រុងបាវិត និងបានជំរុញឲ្យ ក្រុមការងារនេះពិចារណាលើសេណារីយ៉ូល្អបំផុត ទាក់ទងនឹងការកំណត់ពេលវេលា ការកំណត់គន្លងផ្លូវ និងការចំណាយនានា ព្រមទាំងលទ្ធភាពអាចពង្រីកសកម្មភាពសេដ្ឋកិច្ច របស់ផ្លូវនេះនៅក្នុងតំបន់ថ្មីទាំងឡាយ៕