ព័ត៌មានជាតិ

អាវុធហត្ថឃាត់ខ្លួនបុរសម្នាក់ដកហូតបានថ្នាំញៀន២២កញ្ចប់

ព្រះវិហារ: ជនសង្ស័យម្នាក់ ត្រូវបានកម្លាំងកងរាជអាវុធហត្ថស្រុកជាំក្សាន្ត ធ្វើការបង្ក្រាបចាប់ឃាត់ខ្លួនពីបទរក្សាទុក និងចែក ចាយនូវសារធាតុញៀនខុសច្បាប់ ដកហូតបានថ្នាំញៀនចំនួន២២កញ្ចប់ ។ ការចាប់ឃាត់ខ្លួននេះបានធ្វើឡើងកាលពីវេលាម៉ោង១៣និង៣០នាទី ថ្ងៃទី៥ ខែតុលា ឆ្នាំ២០១៦ ស្ថិតនៅចំណុច ភូមិឈើទាលគង ឃុំជាំក្សាន្ត ស្រុកជាំក្សាន្ត ខេត្តព្រះវិហារ។

លោក ឧត្តមសេនីយ៍ត្រី កង សៅគុណ មេបញ្ជាការ កងរាជអាវុធហត្ថខេត្តព្រះវិហារ បានថ្លែងប្រាប់ភ្នាក់ងារព័ត៌មានឲ្យដឹងថា ជនសង្ស័យដែលត្រូវ​កម្លាំងកងរាជអាវុធហត្ថ ធ្វើការឃាត់ខ្លួនខាងលើនេះ មានឈ្មោះ កៅ សុង ហៅចឹក ភេទប្រុសអាយុ៥០ឆ្នាំ មុខរបរមិនពិតប្រា​កដ ស្នាក់នៅភូមិឈើ​ទាលគង ឃុំជាំក្សាន្ត ស្រុកជាំក្សាន្ត ខេត្តព្រះវិហារ។

លោកបានបន្តថា ការឃាត់ខ្លួននេះគឺធ្វើទៅបានដោយមានការ សហការដ៏ល្អរបស់កម្លាំងមូលដ្ឋានកងរាជអាវុធហត្ថស្រុកជាំក្សាន្តដឹកនាំដោយ​លោកវរ:​សេនីយ៍ត្រី ពេជ្រ សុភី មេបញ្ជាការមូលដ្ឋាន បានធ្វើការតាមដាននូវសកម្មភាព របស់ជនសង្ស័យខាងលើជាយូរមកហើយ។ ជាក់ស្តែងការ​បង្ក្រាប​នេះ សមត្ថកិច្ចធ្វើការចាប់យកវត្ថុតាង មួយចំនួនពីជនសង្ស័យរួមមាន ថ្នាំញៀនប្រភេទម៉ាទឹកកក ចំនួន២២កញ្ចប់, ថ្នាំញៀនប្រភេទ មេតំហ្វេតាមីន​គ្រាប់ ចំនួន១៨គ្រាប់, ទូរស័ព្ទ ចំនួន០១គ្រឿង, លុយខ្មែរ ៧០,០០០រៀល និងសម្ភារ:សម្រាប់វេចខ្ចប់គ្រឿងញៀនមួយចំនួនទៀត។

បច្ចុប្បន្ន ជនសង្ស័យរួមនឹងវត្ថុតាង ត្រូវបានកម្លាំងមូលដ្ឋានកងរាជអាវុធហត្ថស្រុកជាំក្សាន្ត កំពុងកសាងសំណុំរឿង បញ្ជូនមកកាន់បញ្ជាការដ្ឋាន​ខេត្តព្រះវិហារ ដើម្បីចាត់ការបន្តតាមនិតិវិធីច្បាប់ ៕

គ្រឿងញៀន

គ្រឿងញៀន

គ្រឿងញៀន

មតិយោបល់