បន្ទាយមានជ័យៈ ភ្ញៀវទេសចរណ៍ជាតិ ប្រមាណជិត២ម៉ឺននាក់ បានទៅកម្សាន្តលេងនៅតំបន់ទេសចរណ៍ថ្មី របស់ក្រុងប៉ោយប៉ែត ខេត្តបន្ទាយមានជ័យ ហៅថា តំបន់ទេសចរណ៍អូរខៃដន ស្ថិត ក្នុងសង្កាត់និមិត្ត ក្នុងឱកាសបុណ្យភ្ជុំបិណ្ឌ ។

តំបន់ទេសចរណ៍បឹងអូរខៃដន ជាតំបន់មួយដែលត្រូវបានអាជ្ញាធរ ក្រុងប៉ោយប៉ែត បង្កើតឡើងមុនបុណ្យភ្ជុំបិណ្ឌ ដោយមានទីតាំងស្ថិតនៅចន្លោះផ្លូវជាតិលេខ៥ និងអូរព្រំដែនកម្ពុជា-ថៃ ចម្ងាយពីក្រុងប៉ោយប៉ែត ប្រមាណ៧គីឡូម៉ែត្រ ។ តំបន់នេះ កើតឡើងបន្ទាប់ពីក្រុមហ៊ុនឯកជនមួយបង្កើតឲ្យ មានអាងស្តុកទឹក សម្រាប់ផ្គត់ផ្គង់ទឹកស្អាត ក្នុងក្រុងប៉ោយប៉ែត និងស្រោចស្រពស្រែប្រាំង របស់ប្រជាកសិករ ដែលមានទឹកស្ដុក ក្នុងអាងដ៏ធំល្វឹងល្វើយ លាយជាមួយធម្មជាតិ ព្រៃភ្នំខ្យល់បករវិចៗ អំណោយផល ដល់ការកំសាន្ត លេងរបស់ភ្ញៀវទេសចរណ៍ទើបធ្វើឲ្យ អាជ្ញាធរក្រុង បានសម្រេចយកតំបន់នេះ ជាតំបន់ទេសចរណ៍ ហើយបានសង់ រោងដែកដំបូលប្រក់ ស័ង្កសី លើមាត់អាង និងចាក់ថ្ម សម្រួលការធ្វើចរាចរលើខ្នងអាង ធ្វើឲ្យឱកាសបុណ្យភ្ជុំបិណ្ឌមកដល់ ពលរដ្ឋបានសម្រុកទៅអង្គុយជួបជុំ បងប្អូន ហូបចុក លេងទឹកយ៉ាងសប្បាយ ។

លោក ង៉ោ ម៉េងជ្រួន អភិបាលក្រុងប៉ោយប៉ែត បានឲ្យដឹងថា តំបន់ទេសចរណ៍អូខៃដន ដែលទើបតែបង្កើតថ្មី ក្នុងឱកាសបុណ្យភ្ជុំបិណ្ឌ ចាប់ពីថ្ងៃទី៣០ ខែកញ្ញា ដល់ថ្ងៃទី០២ ខែតុលា ឆ្នាំ២០១៦ មានប្រជាពលរដ្ឋ មកកម្សាន្តលេងក្នុង១ថ្ងៃ ៗ ប្រមានជាង៥ពាន់នាក់ ធ្វើឲ្យមានការកកស្ទះចរាចរ លើផ្លូវខ្នងអាង និងពុំមានរោងអង្គុយលែង ។ ទោះបីជាមានភ្ញៀវទេសចរណ៍ជាតិ មកកម្សាន្តច្រើនយ៉ាងណាក៏ដោយ អាជ្ញាធរក្រុងបានត្រៀមរួចជាស្រេច ក្នុងការពារ និងរក្សាសន្តិសុខ ប្រកបដោយសុវត្ថិភាព ក្នុងឱកាសបុណ្យភ្ជុំបិណ្ឌ ដោយពុំមានប្រជាពលរដ្ឋណាមានបញ្ហាអ្វីឡើយ ។ មិនតែប៉ុណ្ណោះ ទាក់ទងទៅនឹងសេវាកម្ម តម្លៃរបស់អាជីវករដែលលក់ក្នុងតំបន់ទេសចរណ៍នេះ ត្រូវបានប្រកាសបិទផ្សាយ មិនឲ្យមានការលក់លើសតម្លៃកំណត់ នោះឡើយ ។ ទោះបីជាមានភាពល្អប្រសើរយ៉ាងណាក៏ដោយ តំបន់នេះ ក៏នៅមានការរិះគន់តិចតួច ទៅលើតូបមួយចំនួន លក់ទំនិញក្នុងតម្លៃថ្លៃ និងការបារម្ភទៅលើបញ្ហាបរិស្ថាន ។

លោក ង៉ោ ម៉េងជ្រួន បន្តថា តំបន់ទេសចរណ៍អូរខៃដននេះ នឹងត្រូវ អភិវឌ្ឍន៍ និង អភិរក្ស បន្ថែមទៀត ដូចជា ការទប់ស្កាត់ការនេសាទខុសច្បាប់ មិនឲ្យមានការបរបាញ់សត្វ និងបង្កើតទីតាំងប្រលែងកូនត្រី ដល់ភ្ញៀវទេសចរណ៍ដែលមកកំសាន្ត និងថែទាំងសម្អាតបរិស្ថានឲ្យកាន់តែល្អដើម្បីឆ្លើយតបទៅនិង ការពេញនិយមដល់ភ្ញៀវទេសចរណ៍ ក៏ដូចជាសេវា សាធារណៈ មួយឲ្យពលរដ្ឋបានកម្សាន្តលេង ៕