ឧត្តរមានជ័យៈ ដើម្បីសម្រួលចរាចរណ៍ជូនប្រជាពលរដ្ឋ ធ្វើដំណើរឆ្លងកាត់ស្ពានអូជីក នៃបឹងតាម៉ុកស្រុកអន្លង់វែង ខេត្តឧត្តរមានជ័យ ឲ្យមានលក្ខណៈល្អប្រសើរ នៅព្រឹកថ្ងៃទី០៦ ខែតុលា ឆ្នាំ២០១៦ នេះ កម្លាំងសមត្ថកិច្ចសណ្ដាប់ធ្លាប់ បានចុះរៀបសណ្តាប់ធ្នាប់ ខណៈមានបងប្អូនប្រជាពលរដ្ឋមួយចំនួន បានយកទីតាំងស្ពានអូជីក ធ្វើជាកន្លែងលក់បន្លែត្រីសាច់ ។
បើតាមលោកអនុសេនីយ៍ឯក ញឹក ប៊ុនឈីន នាយផ្នែកសណ្តាប់ធ្នាប់ នៃអធិការដ្ឋាននគរបាលស្រុកអន្លង់វែង បានឲ្យដឹងថា ដោយមានបទបញ្ជាពី លោកវរសេនីយ៍ទោ ស៊ីម វណ្ណះ អធិការនគរបាលស្រុកអន្លង់វែង កាលពីម៉ោង៧និង៥៧នាទីព្រឹក នាថ្ងៃទី០៦ ខែតុលា ឆ្នាំ២០១៦ លោកបានដឹកនាំកម្លាំងចុះរៀបចំសណ្តាប់ធ្នាប់ និងសម្រួលចរាចរណ៍ជូនប្រជាពលរដ្ឋដែលបានធ្វើដំណើរឆ្លងកាត់ស្ពានអូជីក នៃបឹងតាម៉ុក ស្រុកអន្លង់វែង ខេត្តឧត្តរមានជ័យ បន្ទាប់ពីមានប្រជាពលរដ្ឋមួយចំនួនបាន យកទីតាំងស្ពានអូជីក ធ្វើជាកន្លែងលក់បន្លែត្រីសាច់ ដោយចាប់តាំងពីគល់ស្ពានខាងត្បូង រហូតដល់គល់ស្ពានខាងជើង និងនៅតាមបណ្តោយសងខាងស្ពានទាំងមូល ដែលនាំឲ្យកកស្ទះដល់ការធ្វើចរាចរណ៍ របស់ប្រជាពលរដ្ឋជិតឆ្ងាយ ក៏ដូចជាភ្ញៀវជាតិ និងអន្តរជាតិដែលបានឆ្លងកាត់ ។

លោក បានបន្ដទៀតថា សំខាន់ជាងនេះ ទៅទៀតសកម្មភាពលក់ដូរអនាធិបតេយ្យនេះបានធ្វើឲ្យប៉ះពាល់បរិស្ថានផងដែរ ដោយទីតាំងស្ពានអូរជីក ដែលជាស្ពានប្រវត្តិសាស្ត្រតាម៉ុក ក្លាយទៅជាកន្លែងសម្បូរ ដោយសំរាម និងជះ ក្លិនស្អុយ ដោយសារតែប្រជាពលរដ្ឋលក់ដូរនៅចំណុច ខាងលើ បានចោលសំរាម និងចោលកាកសំណល់ត្រីសាច់នៅទីនោះ ។ បន្ទាប់ពីមានការចុះរៀបចំ ពីកម្លាំងនគរបាលសណ្តាប់ធ្នាប់រួចមក ឃើញថា ប្រជាពលរដ្ឋគាត់បានធ្វើតាមការណែនាំ ទាំងបរិស្ថាន ទាំងចរាចរណ៍ផងដែរ ៕