មណ្ឌលគិរីៈ នៅវេលាថ្ងៃត្រង់ថ្ងៃទី០៧ ខែតុលា ឆ្នាំ២០១៦នេះ សមត្ថកិច្ចបានធ្វើការស្រាវជ្រាវ មុខ សញ្ញាវាយកម្ទេចរូបសំណាក លោកតាមួយអង្គនៅភ្នំដោះក្រមុំ ខេត្តមណ្ឌលគិរី កាលពីយប់មិញនោះ ឃើញហើយ ។

លោកតូច យ៉ុន ស្នងការនគរបាល ខេត្តមណ្ឌលគិរី បានថ្លែងប្រាប់អ្នកសារព័ត៌មាន នៅវេលាម៉ោង១១និង៣០នាទីព្រឹក ថ្ងៃទី០៧ ខែតុលា ឆ្នាំ២០១៦នេះថា បន្ទាប់ពីលោកបានបញ្ជាឲ្យ កម្លាំងការិយាល័យកណ្ដាល នគរបាលព្រហ្មទណ្ឌខេត្ត ដឹកនាំដោយលោក សូ សុវណ្ណ ស្នងការរងខេត្ត សហការជាមួយកម្លាំងអធិការដ្ឋាននគរបាល ក្រុងសែនមនោរម្យ ធ្វើការស្រាវជ្រាវរកមុខសញ្ញាវាយកម្ទេចរូបសំណាក លោកតាស្រុះភ្នំដោះក្រមុំ កាលពីទៀបភ្លឺយប់មិញនោះ, ឥឡូវស្រាវជ្រាវរកឃើញហើយគឺ អតីតគ្រូបង្រៀនបច្ចុប្បន្នមានជំងឺ វិកលចរិត ។

លោកសូ សុវណ្ណ ស្នងការរង បានឲ្យដឹងថា កាលពីព្រលឹមថ្ងៃទី០៧ ខែតុលា មានករណីវាយកម្ទេចរូបសំណាក លោកតា មួយអង្គនៅលើភ្នំដោះក្រមុំ បណ្ដាលឲ្យបាក់.ក និងដៃ។ ឥឡូវសមត្ថកិច្ចបានធ្វើការស្រាវជ្រាវរកមុខសញ្ញាឃើញហើយ គឺជនវិកលចរិត អតីតគ្រូបង្រៀនឈ្មោះ ផន ឌឿង ភេទប្រុសអាយុ៣៨ឆ្នាំ ជនជាតិខ្មែរ លំនៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី ។

លោកស្នងការរងខេត្ត បានបន្តទៀតថា មិនត្រឹមតែវាយរូបសំណាក លោកតានៅភ្នំដោះក្រមុំ ប៉ុណ្ណោះទេ នៅព្រឹកថ្ងៃទី០៧ ខែតុលាដដែលនេះ ជនវិកលចរិតរូបនេះ បានទៅវាយកម្ទេចរថយន្តរបស់អធិការ ក្រុងសែនមនោរម្យ អស់មួយគ្រឿងទៀត បណ្ដាលឲ្យខូចខាតជាដំណំ។ នៅគ្រាដែលសមត្ថកិច្ចឃើញ ជនសង្ស័យវិកលចរិត មានចរិតកាចសាហាវ បែបនេះ សមត្ថកិច្ចកំពុងនាំយកមករៀបចំ ឲ្យរស់នៅកន្លែងមានសុវត្ថិភាពហើយ ដើម្បីកុំឲ្យកើតមានបញ្ហាផ្សេងៗ ៕