បាត់ដំបងៈ យុវជនម្នាក់បើកបរម៉ូតូក្នុងល្បឿនលឿន បានព្រលះជាមួយនឹងរថយន្តធុនធំមួយគ្រឿង ដែលឈប់អែបចិញ្ចើមផ្លូវ ចំពីក្រោយយ៉ាងពេញទំហឹង បណ្ដាលឲ្យរងរបួសធ្ងន់ សឹងតែផុតជីវិត ទៅហើយកំពុងស្ថិតក្នុងសភាពសង្គ្រោះបន្ទាន់។

ហេតុការណ៍នេះ បានកើតឡើងនៅវេលាម៉ោង៨និង២០នាទីយប់ថ្ងៃទី៧ ខែតុលា ឆ្នាំ២០១៦ នៅលើកំណាត់ផ្លូវជាតិលេខ៥៧B ក្នុងភូមិគោកខ្ពស់ ឃុំរូងជ្រៃ ស្រុកថ្មគោល ខេត្តបាត់ដំបង។

តាមប្រភពពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គឺគេឃើញរថយន្តរថយន្តម៉ាកហីយ៉ាន់ដាយ ពាក់ស្លាកលេខ ភ្នំពេញ 3C-8416 បើកទៅអែប នឹងចិញ្ចើមផ្លូវខាងស្តាំ ដើម្បីលើកស្រូវ ឡើងលើរថយន្ត។ ភ្លាមៗនោះដែរ ក៏មានម៉ូតូអ៊ែរប្លែត ពណ៌ស លាយខ្មៅ ពាក់ស្លាកលេខ ភ្នំពេញ 1A-8915 បើកបរស្របទិសគ្នាពីលិចទៅកើតយ៉ាងលឿនមកតាមក្រោយ បានបុកនិងគូទរថយន្តយ៉ាងពេញទំហឹង បណ្តាលឲ្យដួលដេកស្ដូកស្ដឹងនៅលើទ្រូងផ្លូវតែម្តង ត្រូវបានប្រជាពលរដ្ឋជួយដឹកបញ្ជូនទៅកាន់មន្ទីរពេទ្យដើម្បីសង្គ្រោះ។

ប្រភពដដែលបានបញ្ជាក់ប្រាប់សមត្ថកិច្ចទៀតថា អ្នកបើកបររថយន្តមានឈ្មោះ រ៉ង សារ៉េន ភេទប្រុស អាយុ៣០ឆ្នាំ រស់នៅភូមិព្រៃទទឹង ឃុំបវេល ស្រុកបវេល ដោយឡែក ភាគីម៉ូតូមានឈ្មោះ អ៊ុយ គឹមហឺ ភេទប្រុស អាយុ២៧ឆ្នាំ រស់នៅភូមិបល្ល័ងក្រោម ឃុំខ្នាចរមាសស្រុកថ្មគោល។

បច្ចុប្បន្នសមត្ថកិច្ចបាននាំយកមធ្យោបាយធ្វើដំណើរទាំងពីរគ្រឿង ទៅរក្សាទុកនៅអធិការដ្ឋានរង់ចាំធ្វើការដោះស្រាយនៅពេលក្រោយ៕