កំពង់ធំៈ លោកឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានបញ្ជាក់ពីនាយទាហាន និងពលទាហានពីសកម្មភាពបញ្ហាគ្រឿងញៀនគឺជាគោលដៅសំខាន់ ក្នុងការទប់ស្កាត់ និងប្រយុទ្ធប្រឆាំង និងធ្វើការផ្សព្វផ្សាយជូនដល់ នាយទាហាន នាយទាហានរង និងពលទាហាន នៃតំបន់ប្រតិបត្តិការសឹករងកំពង់ធំ និងមិនឲ្យមានការពាក់ព័ន្ឋនឹងគ្រឿងញៀនដាច់ខាត មិនតែប៉ុណ្ណោះបានរួមសហការទប់ស្កាត់ជាមួយសមត្ថកិច្ចជំនាញ មិនឲ្យគ្រឿងញៀនហូរចូលក្នុងមូលដ្ឋាន។

លោកឧត្តមសេនីយ៍ទោ ស៊ីន ថារ័ត្ន នាយរងនាយកដ្ឋានអធិការកិច្ច ក.ព.ជ បានបញ្ជាក់ថា បញ្ហាគ្រឿងញៀនមានសន្ទុះកើនឡើងបើប្រៀបធៀបនឹងឆ្នាំ២០១៥ បទល្មើសគ្រឿងញៀនត្រឹមតែ៣០០០ ចំណែកឆ្នាំ២០១៦ មានការកើនឡើងដល់ទៅជាង៥០០០ករណី ក្នុងរយៈពេល៦ខែ ហើយក្នុងគោលបំណងកិច្ចប្រជុំថ្ងៃនេះ គឺមានបំណងឲ្យកងកម្លាំងទាំងអស់ ជួយគ្នាទប់ស្កាត់ និងផ្សព្វផ្សាយ ពីផលប៉ះពាល់នៃគ្រឿងញៀន ដល់បងប្អូន កូនចៅនិងសាច់ញាតិ ឲ្យចៀសផុតកុំឲ្យប្រព្រឹត្ត ឬក៏ចូលរួមចរាចរណ៍ ចែកចាយគ្រឿងញៀន ដើម្បីការពារសុវត្តិភាពជូនសង្គមរបស់យើង ។

លោកឧត្តមសេនីយ៍ទោ គង់ ណារិន នាយរងនាយកដ្ឋានអធិការកិច្ច ក.ព.ជ បានមានប្រសាសន៍ថា បច្ចុប្បន្នគ្រឿងញៀនមិនត្រឹមតែក្នុងចំណោមយុវ័យ និងការភោជនីយដ្ឋាន ក្លឹបកំសាន្តនោះទេ តែវាបានរាតត្បាតរហូតដល់មនុស្សចាស់ទៀតផង កាលពីមុនគ្រឿងញៀនគឺមានការព្រួយបារម្ភត្រឹមអាយុ២៥និង៣០ចុះមក តែពេលនេះ មនុស្សចាស់អាយុ៤៥ទៅ៥០សិប ក៏មានការពាក់ព័ន្ឋនឹងគ្រឿងញៀនដែរ ក៏ដោយសារតែការអូសទាញរបស់ក្រុមជួញដូរគ្រឿងញៀន ដែលបណ្តាលឲ្យបាត់បង់ធនធានមនុស្សបានបំផ្លាញអនាគត ប៉ះពាល់យ៉ាងធ្ងន់ធ្ងរដល់សន្តិសុខសង្គម សេដ្ឋកិច្ច មនុស្សយើងប្រៀបបាននឹងទំពាំងស្នងឬស្សី តែបើ ទំពាំងវាពុក វារលួយក៏យកទៅធ្វើអីក៏មិនកើត ដើម្បីឆ្លើយតបនិងសភាពគ្រោះថ្នាក់នេះ រាជរដ្ឋាភិបាលបានដាក់ចេញនូវយុទ្ធនាការសិក្ខាសាលាផ្សព្វផ្សាយ ដើម្បីមានវិធានការពារសភាពការនេះ ដោយសារជនសេព គ្រឿងញៀន បានធ្វើសកម្មភាព ចាប់ជំរិត គំរាមកំហែង ប្តីប្រពន្ឋទាស់ទែងគ្នា សម្លាប់មនុស្ស និងធ្វើការគ្រឿងញៀនដើម្បីគ្រឿង ស្រ្តីលក់ភេទដើម្បីគ្រឿងញៀន សិស្សគេចសាលា បំផ្លាញបញ្ហាសសៃប្រសាទខួរក្បាល មិនថាសិស្ស ស៊ីវិល ទាហាន ប៉ូលិស ប៉េអ៊ឹម ឲ្យតែសេពគ្រឿងញៀនហើយ គឺខូចអានាគត ខូចការងារ បំផ្លាញជាតិ បំផ្លាញទ្រព្យសម្បត្តិ និងប្រើអំពើងហឹង្សាលើគ្រួសារ។

លោក ឧត្តមសេនីយ៍ទោ ភន បូរ៉ាមី ប្រធាន នាយកដ្ឋានអនុវត្តច្បាប់ អគ្គលេខាធិការដ្ឋាន អ.ជ.ប.គញ បានបញ្ជាក់ថា បញ្ហាអនុវត្តនៃរឿងទប់ស្កាត់បង្រ្កាបគ្រឿងញៀន គឺនាយកដ្ឋាន បានផ្តល់កញ្ចប់ថវិកាចំនួន ៧៧លានរៀលក្នុងមួយឆ្នាំ សម្រាប់ខេត្តកំពង់ធំ និងខេត្តធំៗនិងទទួលបាន ១០០លានរៀល សម្រាប់កិច្ចសហការ បង្រ្កាបគ្រឿងញៀនក្នុងខេត្ត បើទោះបីជាយើងជាទាហាន ហើយមិនមែនជាមន្រ្តីនគរបាលយុត្តិធម៌និងមិនមានសិទ្ធអាចកសាងសំណុំរឿងបញ្ជូនទៅតុលាការក៏ដោយ ក៏ប៉ុន្តែអ្នកទាំងអស់គ្នាគឺជាប្រជាជនម្នាក់ មានកាតព្វកិច្ចជួយខ្លួនឯង និងជួយសង្គម ជួយជាតិ តែបើសិនជាគ្មានការចូលរួមនោះទេ យើងក៏មិនអាចធ្វើសកម្មភាពអ្វីបានដែរ ប្រសាសន៍នេះ ត្រូវបានលើកឡើង នៅក្នុងពិធីផ្សព្វផ្សាយការប្រើប្រាស់ជួញដូរគ្រឿងញៀននិងប្រយុទ្ធប្រឆាំងគ្រឿងញៀនដល់នាយ នាយរង និងពលទាហានតំបន់ប្រតិបត្តិការសឹករងកំពង់ធំ នៅព្រឹកថ្ងៃទី១០ ខែតុលា ឆ្នាំ ២០១៦៕