ភ្នំពេញៈ បុរសម្នាក់បានគៀបជាប់ស្លាប់ក្នុងរថយន្តយ៉ាងវេទនាបន្ទាប់ពីបើករថយន្តក្នុងល្បឿនលឿនរួចក៏ជ្រុលទៅបុកកន្ទុយរថយន្តដែលគេចតទុកចោលនៅលើចិញ្ចើមផ្លូវ។ ហេតុការណ៍គ្រោះថ្នាក់ចរាចរណ៍ខាងលើបានកើតឡើងកាលពីវេលាម៉ោង១០និង៣០នាទីយប់ ថ្ងៃទី១១ ខែតុលា ឆ្នាំ២០១៦ ស្ថិតនៅតាមបណ្តោយផ្លូវលេខ៥៩៨ ក្នុងសង្កាត់គីឡូម៉ែត្រ លេខ៦ ខណ្ឌឬស្សីកែវ រាជធានីភ្នំពេញ ។

ប្រភពពីកន្លែងកើតហេតុបានប្រាប់ថា នៅវេលាខាងលើគេបានឃើញបុរសម្នាក់បើករថយន្តមួយគ្រឿងម៉ាក RAV-4 ពាក់ស្លាកលេខ ភ្នំពេញ 2F-5978 តាមបណ្តោយផ្លូវលេខ៥៩៨ ក្នុងល្បឿនយ៉ាងលឿន លុះបើកមកដល់ចំណុចកើតហេតុស្រាប់តែបុរសដែលរងគ្រោះខាងលើបានបើករថយន្តទៅបុកនិងកន្ទុយរថយន្តដែលគេចតទុកចោលបណ្តាលឲ្យគៀបជាប់ស្លាប់នៅក្នុងរថយន្តតែម្តង ចំណែករថយន្តវិញគឺខ្ទេចទាំងស្រុង ។

ក្រោយពីហេតុការណ៍នេះបានកើតឡើង សមត្ថកិច្ចនគរបាលចរាចរណ៍ខណ្ឌឬស្សីកែវ សហការជាមួយនិងនគរបាលចរាចរណ៍រាជធានីភ្នំពេញ ចុះមកធ្វើការពិនិត្យនិងវាស់វែងដល់កន្លែងកើតហេតុ ដោយបានស្ទូចយករថយន្តទាំងពីរគ្រឿងទៅរក្សារទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយគ្នានៅពេលក្រោយ រីឯសាកសពជនរងគ្រោះត្រូវាបនសមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារធ្វើបុណ្យតាមប្រពៃណី ៕