ភ្នំពេញ: កាលពីថ្ងៃទី១១ ខែតុលា ឆ្នាំ២០១៦ លោក សក់ កញ្ញារិទ្ធ ប្រធានគណ:កម្មាធិការអនុសាខាខណ្ឌសែនសុខ និងសហការី បានចុះសួរសុខទុក្ខ និងនាំយកអំណោយមនុស្សធម៌ផ្តល់ជូនប្រជាពលរដ្ឋរងគ្រោះដោយសារជំនន់ទឹកភ្លៀងចំនួន១៥គ្រួសារ នៅ៣ទីតាំងផ្សេងគ្នា ទី១ នៅភូមិត្រពាំងរាំងចាស់ សង្កាត់ឃ្មួញ ចំនួន៥គ្រួសារ ទី២នៅភូមិក្រាំងអង្រង សង្កាត់ក្រាំងធ្នង់ ចំនួន ៥គ្រួសារ ទី៣នៅភូមិស្លែងរលើង សង្កាត់ទឹកថ្លា ចំនួន៥គ្រួសារ។

ក្នុងឱកាសជួបសំណេះសំណាល និងនាំយកអំណោយទៅចែកជូនទាំង៣ទីតាំងនោះ លោក សក់ ច័ន្ទកញ្ញារិទ្ធិ ប្រធានគណ:កម្មាធិការអនុសាខាបានពាំនាំនូវប្រសាសន៍ សួរសុខទុក្ខពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចប្រធានតែងតែគិតគូរពីផលលំបាករបស់ប្រជាពលរដ្ឋទូទៅដែលជួបការលំបាកខ្លាំង និងជនងាយរងគ្រោះគ្រប់ទិសទី ថ្វីបើ សម្តេចមិនបានអញ្ជើញផ្ទាល់ ក៏មានក្រុមការងារចុះជួបប្រជាពលរដ្ឋដូចពេលនេះដែរ។

លោក សក់ ច័ន្ទកញ្ញារិទ្ធិ បានបញ្ជាក់ថា កាកបាទក្រហមកម្ពុជា គឺជាជំនួយការឲ្យអាជ្ញាធរសាធារណ:លើវិស័យមនុស្សធម៌ដែលបំពេញការងារមនុស្សធម៌ដោយប្រកាន់ខ្ជាប់នូវគោលការណ៍គ្រឹះទាំង ៧ របស់ចលនា ពិសេសគឺ ភាពមនុស្សធម៌ ភាពមិនលម្អៀង និងអព្យាក្រឹតភាព។

ជាមួយគ្នានោះដែរ លោកបានពាំនាំសារមួយចំនួនរបស់សម្តេចកិត្តិព្រឹទ្ធបណ្ឌិត ក្នុងនោះមាន ៖ សូមប្រជាពលរដ្ឋផ្តោតសំខាន់លើបញ្ហាសុខភាព ធ្វើយ៉ាងណាថែទាំសុខភាពឲ្យបានល្អ មានអនាម័យល្អ ពិសាទឹកដាំឆ្អិន លាងដៃមុនពេលហូបអាហារ ពោលគឺត្រូវចេះ ហូបស្អាត ផឹកស្អាត និងរស់នៅស្អាត និងពិសេស យកចិត្តទុក្ខដាក់ខ្ពស់អំពីបញ្ហាខ្យល់កន្ត្រាក់ ផ្គរ រន្ទះ ត្រូវសាងសង់ផ្ទះឲ្យបានរឹងមាំ។

អំណោយមនុស្សធម៌ដែលផ្តល់ជូនគ្រួសារនីមួយៗរួមមាន ៖ អង្ករ ៥០គីឡូក្រាម មី១កេស ត្រីខ១០កំប៉ុង ទឹកត្រី ឬ ទឹកស៊ីអ៊ីវ១យួរ ទឹកសុទ្ធ១កេស នឹងថវិកា២០.០០០រៀល ដោយឡែកប្រជាពលរដ្ឋចំនួន៥គ្រួសារនៅសង្កាត់ក្រាំងធ្នង់ទទួលបានថវិកាបន្ថែមពីលោកចៅសង្កាត់១០.០០០រៀលទៀត៕