ភ្នំពេញ: ក្រសួងធនធានទឹក និងឧតុនិយមបានប្រកាសថា ភ្លៀងនឹងបន្តធ្លាក់ចុះខ្លាំងនៅទូទាំងប្រទេស ចាប់ពីថ្ងៃទី១៤ ដល់ថ្ងៃទី១៧ ខែតុលា ឆ្នាំ២០១៦នេះ ដូច្នេះសូមឲ្យក្រសួងស្ថាប័ន អាជ្ញាធរដែនដី និងសាធារណជនបង្កើនការប្រុងប្រយ័ត្ន និងយកចិត្តទុកដាក់ខ្ពស់ចំពោះជំនន់ទឹកភ្លៀង ដែលនឹងអាចកើតឡើង។

បើតាមសេចក្តីជូនដំណឹងរបស់ក្រសួងធនធានទឹក បានឲ្យដឹងនៅថ្ងៃទី១២ ខែតុលានេះថា ដោយសារតែឥទ្ធិពលនៃសម្ពាធទាប និងប្រព័ន្ធសម្ពាធទាប បាននឹងកំពុងធ្វើឲ្យមានភ្លៀងធ្លាក់ច្រើនស្ទើរទូទាំងប្រទេស ហើយបានបង្កទៅជាជំនន់ទឹកភ្លៀងជាបន្តបន្ទាប់នៅខេត្ត ត្បូងឃ្មុំ ព្រៃវែង ស្វាយរៀង កណ្តាល ខេត្តកំពង់ស្ពឺ និងខេត្តព្រះសីហនុ។

ក្រសួងធនធានទឹកបានឲ្យដឹងទៀតថា ភ្លៀងនឹងបន្តធ្លាក់រាយប៉ាយក្នុងបរិមាណច្រើនបន្ថែមទៀត ពិសេសនៅតំបន់ខ្ពង់រាប និងតំបន់ទំនាបកណ្តាលភាគខាងជើង ចាប់ពីថ្ងៃទី១៣ ដល់ថ្ងៃទី១៧ ខែតុលា៕