ភ្នំពេញៈ សមត្ថកិច្ចខណ្ឌជ្រោយចង្វារឃាត់ខ្លួនជនសង្ស័យម្នាក់ ក្រោយពីយកកាំបិតចុងស្រួចចាក់ទៅលើភាគីម្ខាងទៀតបណ្តាលឲ្យរងរបួសធ្ងន់ ត្រូវបានដឹកយកទៅសង្គ្រោះនៅមន្ទីរពេទ្យ។ ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង២និង៣០នាទីរសៀល ថ្ងៃទី១២ ខែតុលា ឆ្នាំ២០១៦ ដែលនៅត្រង់ចំណុចផ្លូវលំកែងផ្លូវវត្តចាស់ ក្រុម២ ភូមិ១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យឈ្មោះ ហេង សុខច័ន្ទ ភេទប្រុស អាយុ២៩ឆ្នាំ មុខរបរ មិនពិតប្រាកដ មានទីលំនៅផ្ទះលេខ៦៤អា ផ្លូវវត្តចាស់ ក្រុម២ ភូមិ១ សង្កាត់ជ្រោយចង្វារ ខណ្ឌជ្រោយចង្វារ។ ចំណែកឯជនរងគ្រោះឈ្មោះ ជួន ចាន់នី ហៅខ្មៅ ភេទប្រុស អាយុ ១៩ឆ្នាំ មុខរបរ នៅផ្ទះ មានទីលំនៅផ្ទះលេខ២៩ ផ្លូវវត្តចាស់ ក្រុម២ ភូមិ១ សង្កាត់ជ្រោយចង្វារ ខណ្ឌជ្រោយចង្វារ បណ្តាលឲ្យរងរបួសធ្ងន់។

ប្រភពពីសមត្ថកិច្ចបានប្រាប់ឲ្យដឹងទៀតថា មុនពេលកើតហេតុ ជនសង្ស័យបានអង្គុយផឹកស្រាអស់កន្លះកូនកែវក្នុងផ្ទះរបស់ខ្លួន រួចក៏ចេញទៅជាមួយមិត្តភក្តិនៅក្រោមអាគារប៉ាស្ទ័រទៀត ហើយជនសង្ស័យបានយកកាំបិតចុងស្រួចពីក្នុងផ្ទះខ្លួនមកសៀតនឹងចង្កេះ ដើម្បីកាត់ផ្លែចេកក្លែមស្រា។ ខណៈពេលដែលកំពុងអង្គុយផឹក ស្រាប់តែជនរងគ្រោះជិះម៉ូតូទៅក្បែរជនសង្ស័យ រួចក៏ស្រែកដឺដងដាក់ជនសង្ស័យ ហើយក៏បានជិះម៉ូតូចេញមកដល់ផ្លូវវត្តចាស់ ពេលនោះ ជនសង្ស័យឈប់ផឹកស្រានៅក្រោមអាគារ ប៉ាស្ទ័រ រួចក៏បានដើរមកអង្គុយផឹកនៅផ្លូវវត្តចាស់ក្បែរផ្លូវចូលផ្ទះរបស់ខ្លួន។ មួយស្ទុះក្រោយមក ជនរងគ្រោះក៏បានជិះម៉ូតូមកក្បែរជនសង្ស័យម្តងទៀត ហើយក៏ឈប់ម៉ូតូ ឃើញដូចនោះ ជនសង្ស័យស្មានថា ជនរងគ្រោះឈប់ម៉ូតូចុះមកវាយខ្លួន ក៏ងើបទៅដាល់ជនរងគ្រោះចំនួន២ដៃចំកញ្ចឹងកខាងក្រោយ រួចក៏បានមានការប្រតាយប្រតប់គ្នា ធ្វើឲ្យជនសង្ស័យដកកាំបិតដែលបានសៀតនៅចង្កេះចាក់ទៅលើជនរងគ្រោះបណ្តាលឲ្យរងរបួសធ្ងន់ ក្រោយមកជនរងគ្រោះបានស្រែកឲ្យគេជួយ ឃើញដូចនោះ ជនសង្ស័យបានបោះកាំបិតចោល រួចក៏បានរត់គេចខ្លួនទៅផ្ទះរបស់ខ្លួន។ ចំណែកជនរងគ្រោះត្រូវបានអ្នកនៅជិតខាង ដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ រីឯជនសង្ស័យត្រូវបានសមត្ថកិច្ចឃាត់ខ្លួនយកមកអធិការដ្ឋាននគរបាលខណ្ឌជ្រោយចង្វារធ្វើការសាកសួរ ដើម្បីឃុំខ្លួនបណ្តោះអាសន្ន កសាងសំណុំរឿងបញ្ជូនខ្លួនទៅកាន់ តុលាការចាត់ការតាមនីតិវិធីច្បាប់៕

https://youtu.be/w8wQr_xBW1E