ភ្នំពេញៈ កំណាត់ផ្លូវលំចំនួន២ខ្សែស្ថិតនៅក្នុងភូមិបន្លាស្អិត ក្នុងសង្កាត់ឃ្មួញ ជាប់ព្រំប្រទល់ជាមួយនិងសង្កាត់ភ្នំពេញថ្មី ខណ្ឌសែនសុខ បាននិងកំពុងរងនូវការខូចខាតស្ទើរតែទាំងស្រុង សឹងតែធ្វើដំណើរលែងកើតទៅហើយ ដោយអាជ្ញាធរមូលដ្ឋានមិនបានយកចិត្តទុកដាក់ជួយជួសជុលជូនប្រជាពលរដ្ឋនោះឡើយ។

គួរបញ្ជាក់ថាកំណាត់ផ្លូវដែលរងការខូចខាតខាងលើនេះ មួយខ្សែលាតសន្ធឹងពីផ្លូវ១០១៩ ចុះឆ្ពោះទៅកាន់ផ្លូវផ្សារអ៊ីអនថ្មី និងមួយខ្សែទៀតលាតសន្ធឹងពីផ្លូវ១០១៩ទៅដល់បូរីអង្គរ ស្ថិតក្នុងភូមិសាស្ត្រសង្កាត់ឃ្មួញនិងសង្កាត់ភ្នំពេញថ្មី ខណ្ឌសែនសុខ ដែលមានប្រវែងជិត២០០០ម៉ែត្រ។

ប្រជាពលរដ្ឋរៀបរាប់ថាកំណាត់ផ្លូវមួយខ្សែចូលភូមិខាងលើនេះពួកគាត់បានលើកគម្រោងស្នើសុំទៅសាលាសង្កាត់ ក៏ដូចសាលាខណ្ឌឲ្យជួយធ្វើនិងចាក់បេតុងប្រមាណជា១០ឆ្នាំកន្លងមកហើយប៉ុន្តែរាល់សំណើររបស់គាត់បាត់ស្ងាត់ឈឹងតែម្តង បានត្រឹមតែសន្យាខ្យល់ប៉ុណ្ណោះ ។ ទន្ទឹមនឹងនោះដែរ ប្រជាពលរដ្ឋបានសូមសំណូមពរដល់ថ្នាក់ដឹកនាំជួយសង្គ្រោះដល់ពួកគាត់ផងពីព្រោះពួកគាត់អ្នកខ្លះមករស់នៅភូមិខាងលើនេះរយៈពេលជាង២០ឆ្នាំមកហើយ ដោយឡែកផ្លូវមិនមានការអភិវឌ្ឍន៍ឡើយក្រៅពីប្រជាពលរដ្ឋធ្វើនិងជួសជុលដោយខ្លួនឯងនោះ។

ចំពោះផ្លូវខាងលើនេះគេមិនដឹងមូលហេតុអ្វីច្បាស់លាស់ទើបបានជាអាជ្ញាធរមិនទម្លាក់គម្រោងស្ថាបនាផ្លូវមួយខ្សែនេះជូនប្រជាពលរដ្ឋប្រើប្រាស់ឡើយ ហើយមន្ត្រីជំនាញនានាក៏មិនអាចសុំការទំនាក់ទំនងបំភ្លឺអំពីបញ្ហានេះបានដូចគ្នាដោយឡែកកន្លងមកអ្នកសារព័ត៌មានជាច្រើនបានសួរនាំពីបញ្ហានេះតែមន្ត្រីសាលាសង្កាត់ក៏ដូចជាខណ្ឌប៉ុន្តែបានឆ្លើយដាក់គ្នាទៅមុខទៅក្រោយហាក់បីដូចជាមិនមានភាពទទួលខុសត្រូវឡើយ ។

ពាក់ព័ន្ធករណីផ្លូវចូលភូមិខាងលើនេះ លោកប៉ឹល កុសល អភិបាលខណ្ឌសែនសុខបានមានប្រសាសន៍ថាគាត់មិនបានដឹងរឿងប្រជាពលរដ្ឋលើកគម្រោងសុំផ្លូវនេះទេពីព្រោះលោកទើបមកកាន់តំណែងជាអភិបាលខណ្ឌសែនសុខនេះថ្មីៗ ប៉ុណ្ណោះហើយពាក់ព័ន្ធនិងការស្នើសុំរបស់ប្រជាពលរដ្ឋនេះលោកនិងចាត់ឲ្យលោកអភិបាលរង និងមន្ត្រីជំនាញចុះពិនិត្យជាក់ស្តែងមិនខាន។

លោកអភិបាលបានប្រាប់ទៀតថាដោយឡែករឿងផ្លូវមួយខ្សែទៀតដែលលាតសន្ធឹងពីផ្លូវ១០១៩ទៅដល់ផ្សារអ៊ីអនថ្មីនោះ លោកបានលើកគម្រោងទៅសាលារាជធានីភ្នំពេញរួចហើយ និងចាប់ផ្តើមដំណើរការស្ថាបនា នារដូវប្រាំងខាងមុខនេះហើយក៏មានការសហការជាមួយបុរីពិភពថ្មី និងបុរីជីពម៉ុងលែនដ៏ផងដែរ៕

https://youtu.be/ept-oYOyF28