ភ្នំពេញៈ ករណីហិង្សាមួយបានកើតឡើង បន្ទាប់ពីសង្សារមួយគូ បានបបួលគ្នាចូលរួមមេត្រីក្នុងផ្ទះសំណាក់រួច បែរជាមានទំនាស់ឈ្លោះប្រកែកគ្នា រហូតធ្វើឲ្យបុរសជាសង្សារទាញអំបែងកញ្ចក់ចាក់ទៅលើនារីជាសង្សារបណ្តាលឲ្យរងរបួស ត្រូវសមត្ថកិច្ចចាប់ខ្លួន។ ហេតុការណ៍នេះបានកើតឡើងកាលពីវេលាម៉ោង១០និង៤០នាទី ថ្ងៃទី១២ ខែតុលា ឆ្នាំ២០១៦ ស្ថិតនៅចំណុចក្នុងផ្ទះសំណាក់ម្លិះលាភ បន្ទប់លេខ២៣ ផ្លូវជាតិលេខ២ ក្រុមទី១៥ ភូមិ ព្រែកតាឡុង២ សង្កាត់ ចាក់អង្រែក្រោម ខណ្ឌមានជ័យ រាជធានីភ្នំពេញ ។

សមត្ថកិច្ចបានឲ្យដឹងថា ជនដៃដល់មានឈ្មោះ តុង លី ភេទប្រុស អាយុ១៨ឆ្នាំ ស្នាក់នៅផ្ទះលេខ២៤ ផ្លូវលំ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ចំណែកជនរងគ្រោះឈ្មោះ ក្រូច គឹមអៀង ភេទស្រី អាយុ១៨ឆ្នាំ ស្នាក់នៅផ្ទះលេខ១៦៥៣ ផ្លូវលំ ក្រុមទី២៨ ភូមិ ទួលរកា២ សង្កាត់ ចាក់អង្រែក្រោម ខណ្ឌ មានជ័យ រាជធានីភ្នំពេញ ។

យោងតាមប្រភពព័ត៌មាន បានឲ្យដឹងថា មុនពេលកើតហេតុ គេបានឃើញគូសង្សារមួយគូខាងលើនេះ បាននាំគ្នាមករួមមេត្រីនៅក្នុងផ្ទះសំណាក់ខាងលើ ដោយបានជួលបន្ទប់លេខ២៣ រួចក៏នាំគ្នាឡើងទៅកាន់បន្ទប់ ខណៈនោះមិនដឹងជាកើតមានរឿងអ្វី បង្កទៅជាទំនាស់ឈ្លោះប្រកែកគ្នា រហូតបណ្តាលឲ្យបុរសជាសង្សារទាញអំបែងកញ្ចក់មកចាក់លើនារីជាសង្សាររងរបួសតែម្តង បង្កឲ្យមានការភ្ញាក់ផ្អើលដល់សមត្ថកិច្ចចុះមកដល់កន្លែងកើតហេតុ និងចាប់ឃាត់ខ្លួននិងដកហូតបានអំបែងកញ្ចក់១បំណែក យកកាន់ប៉ុស្តិ៍ដើម្បីធ្វើការសាកសួរតែម្តង ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចនាំខ្លួនមកកាន់ អធិការដ្ឋាននគរបាលខណ្ឌមានជ័យ ដើម្បីឃុំខ្លួនបណ្តោះអាសន្ន និងកសាងសំណុំរឿងបញ្ជូនខ្លួនទៅកាន់ តុលាការចាត់ការតាមផ្លូវច្បាប់ ៕