សៀមរាប: លោកវរសេនីយ៍ទោ ហួត សុធី ស្នងការរង ជាប្រធានការិយាល័យកណ្ដាលសន្តិសុខ និងជាតំណាងដ៏ខ្ពង់ខ្ពស់លោកឧត្តមសេនីយ៍ទោ សត ណាឌី ស្នងការនគរបាលខេត្តសៀមរាប បានអញ្ជើញដឹកនាំកិច្ចប្រជុំស្តីពីសន្តិសុខ សុវត្ថិភាព ប្រចាំខែ។

កិច្ចប្រជុំនេះ ធ្វើឡើងនៅសាលប្រជុំ នៃស្នងការដ្ឋាននគរបាលខេត្តសៀមរាប នាព្រឹកថ្ងៃទី១៣ ខែតុលា ឆ្នាំ២០១៦ ដោយបានការចូលរួមពីសំណាក់កម្លាំងការិយាល័យនគរបាលជំនាញមានដូចជា ការិយាល័យប្រឆាំងភេរវកម្ម ការិយាល័យសន្តិសុខផ្ទៃក្នុង ការិយាល័យការពារអន្តរាគមន៍ ការិយាល័យចរាចរណ៍ផ្លូវគោក ការិយាល័យព្រហ្មទណ្ឌកម្រិតធ្ងន់ និងអស់លោក លោកស្រីដែលជាតំណាងក្រុមហ៊ុនសន្តិសុខឯកជនចំនួន២៣ក្រុមហ៊ុនផងដែរ។

ក្នុងកិច្ចប្រជុំខាងលើនេះដែរ កម្លាំងមានសមត្ថកិច្ចឡើងរាយការណ៍អំពីសកម្មភាពការងារដែលបានអនុវត្តកន្លងមកជូនអង្គពិធីទាំងមូលឲ្យបានជ្រាប។បន្ទាប់មក លោកវរសេនីយ៍ទោ ហួត សុធី ស្នងការរង ជាប្រធានការិយាល័យកណ្ដាលសន្តិសុខ បានធ្វើការកោតសរសើរ ដល់គ្រប់កម្លាំងទាំងអស់ ដែលបានធ្វើការសហការគ្នាបានយ៉ាងល្អ ក្នុងការបំពេញភារកិច្ច និងតួនាទីរបស់ខ្លួន នារយ:កាលកន្លងមកនេះ។

ក្នុងនោះ លោកស្នងការរង បានធ្វើការផ្ដាំផ្ញើ ដល់អស់លោក លោកស្រីទាំងអស់ត្រូវធ្វើការហ្វឹកហាត់កងកម្លាំងរបស់ខ្លួនឲ្យបានជាប្រចាំ ដើម្បីចូលរួមកិច្ចការ ការពាររក្សាបាននូវសន្តិសុខ សុវត្ថិភាព សណ្ដាប់ធ្នាប់ជូនបងប្អូនប្រជាពលរដ្ឋ ភ្ញៀវទេសចរណ៍ជាតិ អន្តរជាតិ គណ:ប្រតិភូគ្រប់ជាន់ថ្នាក់ ដែលបានអញ្ជើញបានទស្សនា ឬបំពេញទស្សនកិច្ច ក្នុងខេត្តសៀមរាប របស់យើងឲ្យបានកាន់តែល្អប្រសើរទ្វេឡើងថែមទៀត។ ចំពោះក្រុមហ៊ុនសន្តិសុខឯកជន នៅពេលដែលជ្រើសរើសបុគ្គលិកឲ្យមកបំពេញការងារក្នុងក្រុមហ៊ុនរបស់ខ្លួនត្រូវធ្វើការត្រួតពិនិត្យលក្ខណ:សម្បត្តិ និងបំពេញលក្ខខណ្ឌឲ្យបានត្រឹមត្រូវ ជៀសវាងមានបញ្ហាផ្សេងៗកើតឡើង។ ចំពោះបញ្ហាគោលដៅវិញប្រធាន ឬអនុប្រធាន ត្រូវរាយការណ៍ឲ្យបានលឿនបើមានករណីមិនប្រក្រតីណាមួយកើតឡើងនៅក្នុងគោលដៅរបស់ខ្លួនគ្រប់គ្រង៕