ព្រះសីហនុៈ ជនសង្ស័យប្រុសស្រី២នាក់ ដែត្រូវជាសង្សារនឹងគ្នា ត្រូវកម្លាំងនគរបាលក្រុងបង្ក្រាប និងឃាត់ខ្លួន កាលពីម៉ោងជាង៧៖៣០យប់ថ្ងៃ១៣ ខែតុលា ឆ្នាំ២០១៦ នៅផ្លូវអូរ១សង្កាត់លេខ៤ ក្រុងព្រះសីហនុ ដោយដកហូតថ្នាំញៀនចំនួន៤៩កញ្ចប់តូច និងសម្ភារៈពាក់ព័ន្ធមួយចំនួនទៀត។

អធិការនគរបាលក្រុងព្រះសីហនុ លោកវរសេនីយ៍ត្រី ភុល ភស្តារ ឲ្យដឹងថា ជនសង្ស័យទី១. ឈ្មោះ ណាំ ប៊ុនធឿន (ហៅឆន) ភេទប្រុស អាយុ៣៦ឆ្នាំ មុខរបររត់ម៉ូតូឌុប ទីលំនៅភូមិ១សង្កាត់លេខ៤ ក្រុងព្រះសីហនុ។ ទី២.ឈ្មោះ សុខសុវណ្ណ ហៅ (ដាលីន) ហៅលីនភេទស្រី អាយុ២៤ឆ្នាំ ធ្វើការនៅខារ៉ាអូខេ មានទីលំនៅភូមិ១ សង្កាត់លេខ៤ដូចគ្នា។

វត្ថុតាងដែលសមត្ថកិច្ចចាប់បានរួមមាន ៖ ថ្នាំញៀនមេតំហ្វេតាមីន (ម៉ាទឹកកក ICE) ចំនួន ៤៩កញ្ចប់តូច -ទូរស័ព្ទដៃ១គ្រឿង -ជញ្ជឹងថ្លឹងថ្នាំញៀន១គ្រឿង -សម្ភារៈសម្រាប់ប្រើប្រាស់គ្រឿងញៀនមួយចំនួនទៀត។

បច្ចុប្បន្នជនសង្ស័យទាំង២ និងវត្ថុតាង ត្រូវសមត្ថកិច្ចកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់៕