ភ្នំពេញ: ស្រ្ដីចំណាស់ម្នាក់ដែលគេស្គាល់ថា ជាមេកន្ទុយលេខរួមទាំងកូនកញ្ច្រែងម្នាក់ទៀត(អ្នកទទួលកត់បន្ត) និងអ្នកចូលចាក់ចំនួនបួននាក់ ត្រូវបានកម្លាំងនគរបាល ខណ្ឌសែនសុខធ្វើការឃាត់ខ្លួន ក្រោមការសម្របសម្រួលពីលោកព្រះរាជ្ញារងអមសាលាដំបូងរាជធានីភ្នំពេញ ចុះស្រាវជ្រាវ បង្ក្រាបចាប់ឃាត់ខ្លួន បាន៦នាក់និងដកហូត វត្ថុតាងជាច្រើនទៀត កាលពីវេលាម៉ោង៣រសៀល ថ្ងៃទី១៦ ខែតុលា ឆ្នាំ២០១៦ ស្ថិតនៅក្នុងភូមិរោងចក្រ សង្កាត់ភ្នំពេញថ្មី ខណ្ឌសែនសុខ ។

បើតាមសមត្ថកិច្ចបានឲ្យដឹងថា មេកន្ទុយលេខឈ្មោះ ហ៊ួត គឹមហុង ភេទស្រី អាយុ៥៦ឆ្នាំ មុខរបរ កាត់ដេរ រស់នៅ ផ្ទះកើតហេតុខាងលើ ។ ម្នាក់ទៀតជាអ្នកទទួលកត់បន្តឈ្មោះ លី ថារី ភេទស្រី អាយុ ៣២ឆ្នាំ ស្នាក់នៅផ្ទះលេខ៤៥D ផ្លូវសំរោងអណ្ដែត ភូមិរោងចក្រ សង្កាត់ភ្នំពេញថ្មី ខណ្ឌសែនសុខ ស្រុកកំណើតភូមិដំណាក់ព្រីង ឃុំមហាលាភ ស្រុកកោះសូទិន ខេត្តកំពង់ចាម។

ក្នុងប្រតិបត្តិការចុះបង្ក្រាបនេះ បានទទួលការសម្របសម្រួលពីលោក សេង ហ៊ាង ព្រះរាជអាជ្ញាអមសាលាដំបូង រាជធានីភ្នំពេញ ដឹកនាំផ្ទាល់ដោយលោកវរសេនីយ៍ឯក ម៉ក់ ហុង អធិការខណ្ឌសែនសុខ និងកម្លាំងប៉ុស្តិ៍នានា។

សមត្ថកិច្ចបានបន្តថា បន្ទាប់ពីមានសេចក្តីរាយការណ៍ ពីបងប្អូនប្រជាពលរដ្ឋ ជុំវិញល្បែងស៊ីសង កត់ឆ្នោត រីកដុះដាល ជាច្រើនកន្លែងតាមផ្សារ តាមទីប្រជុំជន ទើបកម្លាំងជំនាញខណ្ឌស្រាវជ្រាវតាមចាប់មេកន្ទុយលេខ ឃាត់ខ្លួនបាន៦នាក់ក្នុងនោះ២នាក់ជាស្ដ្រីមេកត់កន្ទុយលេខ និងអ្នកទទួលកត់បន្ត ហើយបួននាក់ផ្សេងទៀត ជាអ្នកចូលទៅកត់ក៏ត្រូវបាននាំខ្លួនយកទៅសួរនាំ និងដកហូតបានវត្ថុតាង មានម៉ាស៊ីនព្រីន២គ្រឿង ម៉ូតូចំនួន៦គ្រឿង និងកន្ទុយសន្លឹកឆ្នោត ជាច្រើនទៀត ។

ក្រោយពីឃាត់ខ្លួនបាន មេឆ្នោតខាងលើ បាននាំខ្លួនទៅសាកសួរនៅ ផ្នែកជំនាញអធិការដ្ឋានខណ្ឌសែនសុខដើម្បីចាត់ការទៅតាមនីតិវិធី ៕