ភ្នំពេញ: យោងតាមរបាយការណ៍ពីនាយកដ្ឋានសណ្តាប់ធ្នាប់ នៃអគ្គស្នងការដ្ឋាននគរបាលជាតិប្រាប់ឲ្យដឹងថា កាលពីថ្ងៃទី១៧ ខែតុលា ឆ្នាំ២០១៦ មានករណីគ្រោះថ្នាក់ចរាចរណ៍នៅទូទាំងប្រទេសកើតឡើងចំនួន១៣លើក (យប់៣លើក) បណ្តាលឲ្យមនុស្សស្លាប់៨នាក់ (ស្រី២នាក់) រងរបួសធ្ងន់ ១៣នាក់ (ស្រី៣) និងរងរបួសស្រាល១៤នាក់(ស្រី៣)។

ហេតុការណ៍គ្រោះថ្នាក់ចរាចរណ៍ទាំង ១៣លើកនេះ បណ្តាលឲ្យខូចខាតយានយន្ត សរុប ចំនួន ២៥គ្រឿង រួមមាន ម៉ូតូ ចំនួន ១៥គ្រឿង រថយន្តធុនតូច ចំនួន៣គ្រឿង រថយន្តធុនធំ៦គ្រឿង និងយានផ្សេងៗ ចំនួន១គ្រឿង។

ប្រភពព័ត៌មានដដែលប្រាប់បន្តឲ្យដឹងថា មូលហេតុដែលបណ្តាលឲ្យកើតមានករណីគ្រោះថ្នាក់ ចរាចរណ៍ រួមមានល្មើសល្បឿន៤លើក (ស្លាប់២នាក់) មិនប្រកាន់ស្តាំ ២លើក (ស្លាប់២នាក់) ប្រជែង៤លើក (ស្លាប់២នាក់) ស្រវឹង២លើក (ស្លាប់១នាក់) មិនគោរពសិទ្ធិ១លើក (ស្លាប់១នាក់) ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍ ២០នាក់ (យប់៦នាក់)។

គ្រោះថ្នាក់នៅលើដងផ្លូវ រួមមាន ផ្លូវជាតិចំនួន១០លើក និងផ្លូវខេត្ត-ក្រុង ចំនួន២លើក ផ្លូវលំ១លើក។

យោងតាមរបាយការណ៍ពីនាយកដ្ឋានសណ្តាប់ធ្នាប់ នៃអគ្គស្នងការដ្ឋាននគរបាលជាតិប្រាប់បន្តទៀតឲ្យដឹងថា ខេត្ត/រាជធានី ដែលមានគ្រោះថ្នាក់ និងរងគ្រោះថ្នាក់ រួមមាន ភ្នំពេញ ១លើក ស្លាប់២នាក់ របួស០នាក់ កំពង់ស្ពឺ១លើក ស្លាប់១នាក់ តាកែវ ១លើក ស្លាប់១នាក់ របួស១នាក់ កំពង់ធំ១លើក ស្លាប់១នាក់ របួស១នាក់ កំពង់ឆ្នាំង១លើក ស្លាប់១នាក់ និងខេត្តក្រចេះ ១លើក ស្លាប់១នាក់ របួស៣នាក់។

ប្រភពព័ត៌មានពីនាយកដ្ឋានសណ្តាប់ធ្នាប់នៃអគ្គស្នងការដ្ឋាននគរបាលជាតិប្រាប់បញ្ជាក់ឲ្យដឹងថា កាលពីថ្ងៃទី១៧ ខែតុលា ឆ្នាំ២០១៦ លទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុបទូទាំងប្រទេសមាន ចំនួន ២,០៧៧គ្រឿង ក្នុងនោះបានធ្វើការអប់រំចំនួន៥៥២គ្រឿង និងពិន័យសរុបចំនួន ១,៥២៥គ្រឿង៕