ចាប់តាំងពីឆ្នាំ ១៩៩៩ ប្រទេសចិន បានក្លាយជាវិនិយោគិនធំជាងគេនៅកម្ពុជា ដោយបានវិនិយោគជាទឹកប្រាក់លើសពី ២៥ពាន់លានដុល្លារអាមេរិក។ នេះបើយោងតាមការលើកឡើងកាលពីពេលថ្មីៗ របស់លោក ថោង ខុន រដ្ឋមន្ត្រីក្រសួងទេសចរណ៍ ដកស្រង់ដោយទីភ្នាក់ងារសារព័ត៌មានជាតិ។

ចិន បានវិនិយោគ ៧៨លានដុល្លារអាមេរិក ក្នុងឆ្នាំ ២០១៥ និង ៨២២លានដុល្លារអាមេរិក ក្នុងឆ្នាំ ២០១៦ ដែលវិនិយោគលើ កន្លែងកម្សាន្ត សណ្ឋាគារ មហោស្រព្យជាដើម។

កាលពីឆមាសទី ១ ឆ្នាំ ២០១៦នេះ ភ្ញៀវទេសចរជនជាតិចិន ដែលមកទស្សនាប្រទេសកម្ពុជា មានប្រមាណ ៤សែន៤ម៉ឺននាក់ កើនឡើង ១២ភាគរយ បើធៀបនឹងរយៈពេលដូចគ្នាកាលពីឆ្នាំមុន។

បច្ចុប្បន្នជើងហោះហើរត្រង់ពីចិន មកកម្ពុជា មានចំនួន ៨ខ្សែ ក្នុងចំណោម ៣១ខ្សែ ដែលកំពុងប្រតិបត្តិការនៅកម្ពុជា។

គួរបញ្ជាក់ថា កម្ពុជា ក៏បានរៀបចំផែនការយុទ្ធសាស្រ្តក្នុងការទាក់ទាញ ភ្ញៀវទេសចរចិន មកទស្សនាកម្ពុជា ឲ្យបាន ២លាននាក់ នៅឆ្នាំ ២០២០ផងដែរ៕