ភ្នំពេញៈនាយឧត្តមសេនីយ៍ ហ៊ីង ប៊ុនហៀង និងលោកស្រី ប៉ែន ចាន្នី លោក សួស យ៉ារ៉ា ព្រមទាំងពុទ្ធបរិស័ទចំណុះជើងវត្ត នាព្រឹកថ្ងៃទី១៩ ខែតុលា ឆ្នាំ២០១៦នេះ បានហែអង្គកឋិនទានមកកាន់វត្តវិមានតេជៈ ហៅវត្តស្រះចក និងជួបសំណេះសំណាល ជាមួយប្រជាពលរដ្ឋជិត២០០០នាក់។

ថ្លែងក្នុងពិធីសំណេះសំណាលនោះ នាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងកងយុទ្ធពលខេមរភូមិន្ទ នៃក្រសួងការពារជាតិ និងជាមេបញ្ជាការនៃបញ្ជាការដ្ឋានអង្គរក្ស បានមានប្រសាសន៍ថា ក្រោមការដឹកនាំរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ជាប្រមុខដឹកនាំប្រែក្លាយប្រទេសកម្ពុជា ឲ្យកាន់តែមានការអភិវឌ្ឍន៍រីកចម្រើនទាំងវិស័យពុទ្ធចក្រ និងអាណាចក្រ។

នាយឧត្តមសេនីយ៍ បានរំឭកពីទុក្ខលំបាក វេទនា រកទីបំផុតគ្មាន ក្នុងរបបកម្ពុជាប្រជាធិបតី (ប៉ុល ពត) ហើយសម័យនោះមិនឃើញមានគណបក្សនយោបាយ ឬជនមួយចំនួនដែលអះអាងថា ជាអ្នកស្នេហាជាតិ ចេញមុខមកសង្គ្រោះជាតិនោះទេ គឺមានតែសម្តេចទាំង៣ទេ ដែលបានខិតខំតស៊ូ ហ៊ាន ប្តូរជីវិត សាច់ស្រស់ ឈាមស្រស់ ដឹកនាំរំដោះ និងកសាងប្រទេសជាតិ តាំងពីបាតដៃទទេ រហូតធ្វើឲ្យប្រទេសជាតិ រក្សាបាននូវសុខសន្តិភាព សេ្ថរភាព និងការអភិវឌ្ឍន៍រីកចម្រើនលើគ្រប់វិស័យ។ ក្នុងនោះផងដែរ លោកបានរំឭកដល់បងប្អូនប្រជាពលរដ្ឋ ដែលគ្រប់អាយុ បោះឆ្នោតសូម អញ្ជើញទៅចុះឈ្មោះបោះឆ្នោតឲ្យបានគ្រប់គ្នា។

ក្នុងពិធីហែអង្គកឋិនទាននោះដែរ នាយឧត្តមសេនីយ៍ និងលោកស្រី បានប្រគេនបច្ច័យសង្កត់ត្រៃយ៍ ថវិកាចំនួន២០០លានរៀល និងពុទ្ធបរិស័ទ ចំណុះជើងវត្ត បច្ច័យ៨០៧៥ដុល្លារ ប្រគេនដល់វត្តស្រះចក សម្រាប់ទុកកសាងវត្ត និងសមិទ្ធផលនាៗ។

ក្នុងនោះដែរ នាយឧត្តមសេនីយ៍ ក៏បានពាំនាំអំណោយសម្តេចតេជោ និងសម្តេច កិត្តិព្រឹទ្ធបណ្ឌិត ចែកជូនដល់ សាលាខណ្ឌដូនពេញ សង្កាត់ស្រះចក ជូនតាជីយាយជី ប្រជាពលរដ្ឋ និងសិស្សានុសិស្ស កាកបាទក្រហម កាយរិទ្ធ ផងដែរ៕