ព្រះសីហនុៈ ជនសង្ស័យចំនួន៣នាក់ ត្រូវបានកម្លាំងនគរបាលនៃការិយាល័យប្រឆាំងគ្រឿងញៀន សហការជាមួយកម្លាំងអធិការក្រុងព្រះសីហនុ បង្ក្រាបករណីជួញដូរដោយខុសច្បាប់នូវសារធាតុញៀនធ្វើការចាប់ឃាត់ខ្លួនបាន កាលពីវេលាម៉ោង៨និង៣០នាទីយប់ថ្ងៃទី១៩ខែតុលា ឆ្នាំ២០១៦ ស្ថិតនៅចំណុចក្រុមទី២៨ ភូមិ១ សង្កាត់៤ ក្រុងព្រះសីហនុ។

សមត្ថកិច្ចបានឲ្យដឹងថា ជនសង្ស័យទាំង៣នាក់ដែលចាប់ខ្លួនបាន ទី១ឈ្មោះ ហម មករា ភេទប្រុស អាយុ២០ឆ្នាំ។ ជនសង្ស័យទី២ឈ្មោះ ពៅ ខេមរា ភេទប្រុស អាយុ៣០ឆ្នាំ និងជនសង្ស័យទី៣ឈ្មោះ ពេជ្រ ណេ ភេទស្រី អាយុ៣៣ឆ្នាំ។ ក្នុងនោះដែរ វត្ថុតាងដែលសមត្ថកិច្ចដកហូតបានរួមមាន ថ្នាំញៀន មេតំហ្វេតាមីន០៩កញ្ចប់តូច និងទូរស័ព្ទ ០១គ្រឿង។

បច្ចុប្បន្នជនសង្ស័យទាំង៣នាក់ខាងលើរួមនិងវត្ថុតាងត្រូវបានកម្លាំងជំនាញកំពុងកសាងសំណុំរឿងដើម្បីបញ្ជូនទៅកាន់សាលាដំបូងខេត្តព្រះសីហនុចាត់ការតាមផ្លូវច្បាប់ ៕