កំពង់ចាម: កម្លាំងសាខាគយ និងរដ្ឋករ សហការណ៍ជាមួយកម្លាំងកងរាជអាវុធហត្ថ និងកម្លាំងនគរបាលខេត្តកំពង់ចាម បានចុះត្រួតពិនិត្យឆែកឆេរតាមហាងទិញ និងលក់ម៉ូតូជាច្រើនកន្លែង កាលពីព្រឹកថ្ងៃទី២១ តុលា ២០១៦ នៅភូមិទី៣ សង្កាត់វាលវង់ និងភូមិទី៨ សង្កាត់កំពង់ចាម ក្រុងកំពង់ចាម ជាលទ្ធផលកម្លាំងចម្រុះ បានរឹបអូសម៉ូតូគ្មានពន្ធចំនួន១៤គ្រឿង។
ក្នុងប្រតិបត្តិការខាងលើ គឺមានការសម្របសម្រួលពីស្ថាប័នអយ្យការអមសាលាដំបូងខេត្តកំពង់ចាម លោក ប្រាក់ ចាន្នី ប្រធានសាខាគយ និងរដ្ឋករខេត្តកំពង់ចាម បានដឹកនាំកម្លាំងមានទាំងអាវុធហត្ថ និងកម្លាំងនគរបាលជាច្រើននាក់ បានចុះធ្វើការត្រួតពិនិត្យឆែកឆេរតាមហាងទិញ និងលក់ម៉ូតូជាច្រើនកន្លែង នៅក្នុងក្រុងកំពង់ចាម។
ក្រោយពីធ្វើការផ្ទៀងផ្ទាត់លើលិខិតស្នាម ដោយរកឃើញម៉ូតូចំនួន១៤គ្រឿង ដែលសុទ្ធសឹងគ្មានពន្ធនាំចូល ហើយត្រូវបានសមត្ថកិច្ចធ្វើការរឹបអូសពីហាងលក់ម៉ូតូ យកទៅរក្សាទុកនៅស្នាក់ការសាខាគយ និងរដ្ឋករខេត្តកំពង់ចាម ដើម្បីចាត់ការបន្តតាមនិតិវិធីច្បាប់៕
មតិយោបល់