ភ្នំពេញៈ គ្រោះថ្នាក់ចរាចរណ៍មួយ បានកើតឡើងរវាងរថយន្ត២គ្រឿង បើកបរក្នុងល្បឿនលឿន ជ្រុលបុកគ្នាពេញទំហឹងបណ្ដាលឲ្យរងការខូចខាត ផ្អើលដល់ប្រជាពលរដ្ឋជួយស្ទាក់ចាប់រថយន្ត១គ្រឿង ដែលបានព្យាយាមបើករត់បញ្ច្រាសទិសចរាចរណ៍ ។ ហេតុការណ៍នេះបានកើតឡើងកាលពីវេលាម៉ោង ១រំលងអាធ្រាតឈានចូលថ្ងៃទី ២៥ ខែតុលា ឆ្នាំ២០១៦ ស្ថិតនៅចំណុចក្បែរធានាគារ ជាតិកម្ពុជា កាណាឌីយ៉ា តាមបណ្ដោយផ្លូវព្រះមុនីវង្ស ត្រង់ផ្លូវបំបែកជាបួន សង្កាត់ស្រះចក ខណ្ឌដូនពេញ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្ត២គ្រឿង បើកបរក្នុងល្បឿនយ៉ាងលឿន តាមបណ្ដោយផ្លូវខាងលើ ដោយរថយន្តទី១ម៉ាក ព្រូស ពណ៌ស ពាក់ស្លាកលេខ ភ្នំពេញ2AD-4536 មួយគ្រឿង បើកបរដោយបុរសម្នាក់ បើកបរក្នុងទិសដៅពីលិចទៅកើតក្នុងល្បឿនលឿន រីឯរថយន្ត១គ្រឿងទៀតម៉ាក ហាយឡេនឌ័រ ពាក់ស្លាកលេខ ភ្នំពេញ 2AJ-6839 ពណ៌កណ្ដុរប្រម៉េះ បើកបញ្ជ្រាស់ទិសគ្នា បើកបរដោយនារីម្នាក់ជាជនជាតិចិន ដោយរថយន្តទាំង២មកដល់ចំណុចកើតហេតុក៏បានបុកគ្នាពេញទំហឹង ប៉ុន្តែមិនមានអ្នករងរបួសនោះទេ។ បន្ទាប់ពីបុករួចរថយន្ត១គ្រឿងដែលបើកបរដោយនារីជនជាតិចិនម្នាក់នោះបានបើករត់បញ្ច្រាសផ្លូវត្រូវបានសមត្ថកិច្ចនិងប្រជាពលរដ្ឋបានជួយដេញស្ទាក់ចាប់ប្រហែលជាង៥០ម៉ែត្រពីរថយន្តព្រូស។

ក្រោយពេលកើតហេតុ ម្ចាស់រថយន្តទាំងសងខាងប្រកែកគ្នាយកឈ្នះរៀងខ្លួននៅនឹងកន្លែង នៅតែសម្រួលគ្នាមិនត្រូវទើបសមត្ថកិច្ចធ្វើការវាស់រួចយករថយន្តទាំង២គ្រឿងទៅរក្សារទុកនៅ ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ អនុវត្តទៅតាមនីតិវិធីច្បាប់៕

https://youtu.be/27RA0G6WErc