Post News Media ព័ត៌មានជាតិ ឧបករណ៍​នេសាទ​...

ឧបករណ៍​នេសាទ​ខុសច្បាប់​​​ ​នៅ​តែ​កើត​ព្រោងព្រាត​ លើ​ទឹក​ដី​កំពង់ឆ្នាំង

កំពង់ឆ្នាំង: ការ​ប្រើប្រាស់​ឧបករណ៍​នេសាទខុសច្បាប់​ ​ពីសំណាក់​ក្រុមឈ្មួញ​ ​នៅចំណុចស្លាបកុក ថ្នល់ឈើទាល ​ស្ថិត​ក្នុងឃុំផ្លូវទូក និងព្រែកសាយ ​ជាប់ឡូត៍អភិរក្សបង្គោលកី​ ក្នុងឃុំច្រណូក ស្រុកកំពង់លែង ខេត្ត​កំពង់ឆ្នាំង ​ត្រូវ​គេមើលឃើញថា ​នៅ​តែ​មាន​បទល្មើស​នេសាទ​​កើត​មាន​ព្រោងព្រាត​ ​បាន​ក្លាយ​ទៅ​ជា​ជំងឺមហារីក​ទៅ​ហើយ​ ដែលគ្មានថ្នាំណា​អាចព្យាបាល​ឲ្យ​ជា​ដាច់​បាននោះឡើយ។

ប្រជាពលរដ្ឋ ​ដែល​មាន​មុខរបរ​ជា​​អ្នក​នេសាទលក្ខណ:គ្រួសារ​នៅ​តាម​ដងទន្លេ ​មានប្រតិកម្ម​ទៅ​លើជំនាញជលផល ​ពីថ្នាក់ក្រោមរហូតដល់ថ្នាក់លើ​ ដែល​មិន​បានយកចិត្តទុកដាក់ និង​ខ្វាយខ្វល់ ចំពោះអនុសាសន៍៧ ​ចំណុច​​របស់សម្ដេច ​ដែល​ហាម​ដាច់​ខាត​ចំពោះការប្រើ​ឧបករណ៍​នេសាទ​ខុសច្បាប់ ​មានដូចជារបាំងស្បៃមុង​ និងសាច់អួនក្រឡា​ញឹក​ និង​ឧបករណ៍ផ្សេងៗទៀត​ ​​ដែល​ក្រុម​ជនល្មើស​នៅតែប្រើប្រាស់ឧបករណ៍ស្បៃមុងរាប់សិបរបាំង ​និងកន្លែងផ្សេងៗ​ដាក់​ចាប់​យក​ត្រីតាំង​ពីរដូវដំឡើង​ រហូតមកដល់ពេលនេះ។

សេចក្ដីរាយការណ៍ដដែល​បានបន្ដ​ថា នៅក្នុងខេត្តកំពង់ឆ្នាំង បទល្មើសនេសាទ ត្រូវគេមើលឃើញ​ថា នៅតែកើតមានរាល់ឆ្នាំ ខណ:ដែលការនេសាទប្រើឧបករណ៍ខុសច្បាប់​ខាងលើនេះ​ធ្វើឲ្យ​ទិន្នផលត្រីបានធ្លាក់ចុះ ស្របពេលដែលក្រុមឈ្មួញនៅចាំឈរទិញត្រីតូចៗយកទៅធ្វើជាចំណីត្រីឆ្តោ។ នៅរដូវប្រាំង គឺចាប់ពីពាក់កណ្តាលខែតុលាទៅ ឧបករណ៍ល្មើសចម្រុះបានកើតឡើង មាន​របាំងស្បៃមុង និងរបាំងសាច់អួនក្រឡាញឹក អួនយ៉ាំងកាវ ឧបករណ៍ទាំងតូចទាំងធំនេះ កំពុងត្រូវ​បានក្រុមឈ្មួញ ដែលមានខ្នងបង្អែក​រត់ការជាមួយសមត្ថកិច្ច​ដើម្បី​បានចុះធ្វើនៅពេល​ខាង​មុខនេះផងដែរ។

សូម​រំឭកថា ក​ន្លងមក​រដ្ឋបាលជលផលកំពង់ឆ្នាំង​ ធ្លាប់បានប្រកាសក្តែងៗថា​ ខ្លួនកំពុងតែខិតខំ​អនុវត្ត​តាមអនុសាសន៍ ៧ចំណុច​របស់ប្រមុខរាជរដ្ឋាភិបាល​ដោយធ្វើការទប់ស្កាត់​ និង​បង្ក្រាបជាប្រចាំ​ ខណ:ដែលគេសង្កេត​ឃើញមន្ត្រីជលផលខ្លះ បានចុះបង្ក្រាប​របាំង​ស្បៃមុងដែរ តែបើប្រៀបធៀបទៅនឹងផលិតផលនៃការបង្ក្រាបកន្លងមក គឺគេធ្វើ​បានតែប្រជា​នេសាទណាតូចតាច​ដែលមិនបានបង់ប្រាក់ឲ្យគេប៉ុណ្ណោះ។

ក្នុងនោះដែរ ប្រជាពលរដ្ឋស្នើសុំ​លោក​ អេង ជាសាន ប្រធានរដ្ឋបាលជលផល ​ មេត្តា​ចុះ​ពិនិត្យ​មើល​ដោយផ្ទាល់​ និង​ចាត់​វិធានការ​ឲ្យ​បានម៉ឺងម៉ាត់​ ចំពោះ​មន្ត្រី​ជើង​ដប់​ផង ​ដែល​​​មិនបាន​​អនុវត្ត​​តាម​ប្រសាសន៍សម្ដេចតេជោ​ ​នាយករដ្ឋ​មន្ដ្រី​​៕

បទល្មើសនេសាទ

បទល្មើសនេសាទ

បទល្មើសនេសាទ

បទល្មើសនេសាទ