Post News Media ព័ត៌មានជាតិ ចៅសង្កាត់ព្រែ...

ចៅសង្កាត់ព្រែកប្រាវាយសន្តិសុខម្នាក់ ដួលបោកក្បាលផ្ទុបជញ្ជាំងថ្មរបួសធ្ងន់ធ្ងរ

ភ្នំពេញ: លោក ហួរ ហួត ចៅសង្កាត់ព្រែកប្រា បានប្រើអំពើរហិង្សាដោយចេតនាដោយទះកំផ្លៀងមួយដៃយ៉ាងធ្ងន់ទៅលើបុរសម្នាក់ជាសន្តិសុខរបស់បុរី សម្បត្តិមានហេង៣ ចំសៀតផ្កា បណ្តាលឲ្យដួលដាច់ផ្ងារបោកក្បាលទៅលើជញ្ជាំងថ្មប៉ុស្តិ៍យាមដួលដេកទៅលើដីសន្លប់ស្តូកស្តឹងបាត់ស្មារតី រងរបួសយ៉ាងធ្ងន់ធ្ងរ ក្នុងជម្លោះពាក្យសម្តីបន្តិចបន្តួច រឿងចតរថយន្តបាំងច្រកផ្លូវចូលបុរីខាងលើនោះ។ ហេតុការណ៍នេះបានកើតឡើងកាលពីវេលាម៉ោង៥និង៤៥នាទីល្ងាច ថ្ងៃទី២៤ ខែតុលា ឆ្នាំ២០១៦ នៅខាងមុខស្នាក់ការលក់ផ្ទះល្វែងរបស់បុរី សម្បត្តិមានហេង៣ ដែលមានទីតាំងនៅតាមបណ្តោយផ្លូវជាតិលេខ១ ទល់មុខវិទ្យាល័យច្បារអំពៅ ភូមិបឹងឈូក ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។

តាមប្រភពព័ត៌មានពីនគរបាលខណ្ឌច្បារអំពៅបានប្រាប់ឱ្យដឹងថា បុរសរងគ្រោះមានឈ្មោះ មាស ដុំដី អាយុ១៩ឆ្នាំ មុខរបរជាសន្តិសុខយាម ស្នាក់នៅក្នុងស្នាក់ការលក់ផ្ទះល្វែងបុរីសម្បត្តិមានហេង៣ខាងលើ មានស្រុកកំណើតនៅភូមិទួលខ្ពស់ ឃុំចំបក់ ស្រុក ស្វាយជ្រុំ ខេត្តស្វាយរៀង។ បុរសជាជនដៃដល់មានឈ្មោះ ហួរ ហួត ជាចៅសង្កាត់ព្រែកប្រា មានទីលំនៅខាងមុខច្រកចូល បុរីសម្បត្តិមានហេង ៣ ផ្លូវជាតិលេខ១ ក្នុងភូមិបឹងឈូក សង្កាត់និរោធ ខណ្ឌច្បារអំពៅ។

បើយោងតាមប្រភពព័ត៌មានបានឲ្យដឹងថា មុនពេលកើតហេតុ លោក ហួរ ហួត បានបើករថយន្តមួយគ្រឿង(មិនស្គាល់ម៉ាក)ក្នុងទិសដៅពីលោចទៅកើតក្នុងទិសដៅបញ្ច្រាសទិសចូលទៅផ្ទះរបស់ខ្លួនដោយមានបំណងចតនៅលើផ្លូវខាងមុខផ្ទះរបស់លោក (នៅក្បែរកន្លែងកើតហេតុ)ដោយធ្វើឲ្យបាំងច្រកចូលក្នុងស្នាក់ការលក់ផ្ទះល្វែងបុរីខាងលើ កម្លាំងសន្តិសុខម្នាក់ដែលយាមនៅទីនោះក៏បានដើរទៅប្រាប់លោកឲ្យចតរកកន្លែងចតរថយន្តឲ្យស្រួលជៀសវាងការបាំងផ្លូវ និងមេស្តីឲ្យផងដែរ។ ក្រោយពេលដែលលោក ហួរ ហួត ចៅសង្កាត់ព្រែកប្រា បានចតរថយន្តនៅខាងមុខផ្ទះរបស់ខ្លួនទៅតាមការណែនាំរបស់សន្តិសុខរូបនោះរួចហើយ លោកក៏បានចុះពីលើរថយន្ត ដើរសំដៅមកកាន់ប៉ុស្តិ៍យាមស្នាក់ការបុរីខាងលើ។ ពេលនោះលោកក៏បានទៅសួរនាំសន្តិសុខរូបនោះនិងប្រាប់ថា «រូបលោកជាចៅសង្កាត់ព្រែកប្រា»ហើយសន្តិសុខរូបនោះក៏បានលត់ជង្គង់សុំទោសផងដែរ ស្របពេលនោះបុរសជាសន្តិសុខរងគ្រោះបានជិះម៉ូតូមួយគ្រឿងមានគ្នាពីរនាក់មកដល់ និងបានចុះមកសួរថា «មានការអ្វី?» គ្រាន់តែនិងយាយមិនទាន់ផុតពីមាត់ផងក៏ស្រាប់តែលោក ហួរ ហួត ទះកំផ្លៀងមួយដៃយ៉ាងធ្ងន់ចំសៀតថ្កាបណ្តាលឲ្យរូបគេដួលដាច់ផ្ងាបោកក្បាលផ្ទុបទៅនឹងជញ្ជាំងប៉ុស្តិ៍យាមសន្លប់បាត់ស្មារតីឈឹងតែម្តង។

ក្រោយពេលកើតហេតុ បុរសជាសន្តិសុខរងគ្រោះត្រូវបានក្រុមគ្រួសារនិងអ្នកធ្វើការជាមួយគ្នាបញ្ជូនទៅធ្វើការព្យាបាលនៅមន្ទីរពេទ្យបង្អែកមានជ័យ តែដោយសារតែសភាពជំងឺធ្ងន់ធ្ងរពេក ក៏សម្រេចបញ្ជូនទៅធ្វើការសង្គ្រោះបន្ទាន់នៅមន្ទីរពេទ្យមិត្តភាពខ្មែរ សូវៀតវិញ រហូតមកដល់ព្រឹកថ្ងៃទី ២៥ ខែ តុលា ឆ្នាំ ២០១៦ ទើបតំណាងក្រុមហ៊ុន និងក្រុមគ្រួសាររបស់ជនរងគ្រោះមកដាក់ពាក្យបណ្តឹងនៅអធិការនគរបាលខណ្ឌច្បារអំពៅឲ្យជួយរកយុត្តិធ៌ម។
ទាក់ទងនឹងបញ្ហានេះដែរ លោក ហួរ ហួត ចៅសង្កាត់ព្រែកប្រា បានទទួលកំហុសដោយបានធ្វើការសុំទោស និងជួយចេញថ្លៃព្យាបាលដល់ជនរងគ្រោះដើម្បីបញ្ចប់រឿងផងដែរ ៕

ករណីហិង្សា

ករណីហិង្សា

ករណីហិង្សា

ករណីហិង្សា

ករណីហិង្សា

ករណីហិង្សា

ករណីហិង្សា