សៀមរាប: ការធ្វើចរាចរចែកចាយ និងការដាក់តាំងលក់ទឹកក្រូចដបជ័រហួសកាលបរិច្ឆេទប្រើប្រាស់ ចាប់តាំងពីដបតូច មធ្យម និងដបធំ នៅលើទីផ្សារជនបទ វាជាការគំរាមកំហែងយ៉ាងធ្ងន់ធ្ងរ ចំពោះសុខភាពប្រជាពលរដ្ឋ។
លោក ង៉ែត ចេក ប្រធានសាខាកាំកុងត្រូលខេត្តសៀមរាប បានដឹកនាំក្រុមការងារ ចុះប្រតិបត្តិការត្រួតពិនិត្យសុវត្ថិភាពភេសជ្ជ: និងចំណីអាហារ នៅតាមបណ្តាផ្សារនៃទីប្រជុំជននានា មានចំនួន៤ស្រុក គឺ (ឃុំស្រែណូយ ស្រុកវ៉ារិន) (ឃុំចារឈូក ស្រុកអង្គរជុំ) (ឃុំជ្រោយនាងនួន ស្រុកស្រីស្នំ) និងចុងក្រោយបំផុត នៅថ្ងៃទី២៤ ខែតុលា ឆ្នាំ២០១៦ នៅឃុំស្វាយលើ ស្រុកស្វាយលើ ខេត្តសៀមរាប។
លោកបានបន្តថា បញ្ហាប្រឈមចំពោះ វត្តមានទឹកក្រូចដបជ័រហួសកាលកំណត់ប្រើប្រាស់នៅទីជនបទគឺទី១ ក្រុមឈ្មួញបោះដុំទំនិញចេញពីទីក្រុងទាំងនោះ ឬឈ្មួញបោះដុំមិនមានប្រភពច្បាស់លាស់ មិនមានភាពស្មោះត្រង់ចំពោះដៃគូលក់រាយរបស់ខ្លួននៅតាមទីជនបទ ទី២ អ្នកលក់រាយតាមផ្សារជនបទ ការយល់ដឹងនៅមានកម្រិត រួមផ្សំនឹងការធ្វេសប្រហែសផងដែរ ចំពោះការជ្រើសរើសទំនិញ ការពិនិត្យ និងការរៀបចំទុកដាក់ទំនិញរបស់ខ្លួន។ ដូចជានៅផ្សារទីប្រជុំជនស្រុកស្វាយលើ តាមផ្ទះលក់ចាប់ហួយចំនួន៣ផ្ទះ សាខាកាំកុងត្រូលខេត្តសៀមរាប ប្រមូលបានទឹកក្រូចដបជ័រហួសកាលកំណត់ប្រើប្រាស់បានចំនួនជាង១០០ដប ក្រៅពីនោះមានមីកញ្ចប់ កាហ្វេកញ្ចប់ ទឹកដោះគោខាប់ និងស្ករគ្រាប់មួយចំនួនទៀត។
លោក បន្ថែមថានៅក្នុងផ្សារស្រុកស្វាយលើ ការពិនិត្យ និងពិសោធន៍ រកជាតិគីមីលើចំណីអាហារ រួមមាន ស្ពៃជ្រក់ ប្រហុក សណ្តែកបណ្តុះ សាច់ក្រក ផ្លែឈើ និងការពិនិត្យជាតិអ៊ីយ៉ូត ក្នុងអំបិល ឃើញថា ស្ថិតក្នុងសភាពល្អប្រសើរ ដោយមិនបានរកឃើញសារធាតុគីមីណាមួយដែលច្បាប់ហាមឃាត់នោះឡើយ។
លោក ង៉ែត ចេក បញ្ជាក់ថា ប្រតិបត្តិការត្រួតពិនិត្យសុវត្ថិភាពចំណីអាហារទាំងនេះ ក្រុមការងារបានព្យាយាមពន្យល់ ណែនាំ និងអប់រំឲ្យបណ្តាអាជីវករ អ្នកលក់ដូរចំណីអាហារ និងភេសជ្ជ:ទាំងអស់ ត្រូវមានការប្រុងប្រយ័ត្ន និងមានស្មារតីទទួលខុសត្រូវខ្ពស់ ចំពោះសុខភាពអតិថិជនរបស់ខ្លួន។ ឯការដកហូតបានទំនិញខូចគុណភាពពីអ្នកលក់ វាមិនមែនជាគោលដៅរបស់កាំកុងត្រូលនោះទេ តែអ្វីដែលជាជោគជ័យរបស់មន្រ្តីកាំកុងត្រូល គឺនៅតាមបណ្តាទីផ្សារនានា មិនមានការដាក់តាំងលក់ទំនិញខូចគុណភាព ឬទំនិញហួសកាលបរិច្ឆេទប្រើប្រាស់ ដើម្បីសុខភាពល្អប្រសើរ របស់ប្រជាពលរដ្ឋតែប៉ុណ្ណោះ៕
មតិយោបល់