ភ្នំពេញៈ កម្លាំងនគរបាលអន្តរាគមន៍ខណ្ឌមានជ័យ សហការជាមួយនិងកម្លាំងនគរបាលប៉ុស្តិ៍ចាក់អង្រែលើ បានធ្វើការឃាត់ខ្លួនមុខសញ្ញាជួញដូរគ្រឿងញៀនយ៉ាងសកម្មម្នាក់ និងដកហូតថ្នាំញៀនបាន១២កញ្ចប់តូចផងដែរ។

ប្រតិបត្តិការបង្ក្រាបមុខសញ្ញាជួញដូរគ្រឿងញៀននេះ បានធ្វើឡើងកាលពីវេលាម៉ោង៥និង៤៥នាទីល្ងាច ថ្ងៃទី២៧ ខែតុលា ឆ្នាំ២០១៦ នៅចំណុចលើវាលខ្សាច់ ផ្លូវ៦០ម៉ែត្រ ក្រុម៨ ភូមិព្រែកតាគង់ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្ននំពេញ។

តាមប្រភពព័ត៌មានពីនគរបាលបានប្រាប់ឱ្យដឹងថា ជនសង្ស័យមានឈ្មោះ ចក់ រ៉ាវី ហៅ ប្រុស អាយុ២៤ឆ្នាំ មុខរបជាសន្តិសុខរបស់ក្រុមហ៊ុន GBS ស្នាក់នៅផ្ទះជួលគ្មានលេខ ផ្លូវបេតុង ក្នុងសង្កាត់បឹងកេងកងទី៣ ខណ្ឌចំការមន ត្រូវបានឃាត់ខ្លួន ខណៈរូបគេកំពុងតែឈរធ្វើសកម្មភាពចែកចាយថ្នាំញៀននៅជំណុចខាងលើ។

មុនពេលកើតហេតុពេលកម្លាំងកងអន្តរាគមន៍នៃអធិការនគរបាលខណ្ឌមានជ័យ និងកម្លាំងនគរបាលប៉ុស្តិ៍ចាក់អង្រែលើរួមគ្នាធ្វើការដើរល្បាតនៅក្នុងភូមិសាស្ត្ររបស់ខ្លួនទៅដល់ចំណុចខាងលើ ក៏ស្រាប់តែបានប្រទះឃើញជនសង្ស័យកំពុងតែឈរធ្វើសកម្មភាពចែកចាយគ្រឿងញៀន ក៏ធ្វើការឃាត់ខ្លួនតែម្តង ដោយដកហូតបានថ្នាំញៀនប្រភេទម្សៅក្រាមព៌ណសថ្លា(ម៉ាទឹកកក)ចំនួន១២កញ្ចប់តូច រួមទាំងវត្ថុតាងមួយចំនួនទៀតផងដែរ។

ក្រោយឃាត់ខ្លួន ជនសង្ស័យ រួមទាំងវត្ថុតាង ត្រូវបានសមត្ថកិច្ចបញ្ជូនទៅកាន់នគរបាលប៉ុស្តិ៍ចាក់អង្រែលើ ដើម្បីធ្វើការសាកសួរ និងបន្តបញ្ជូនទៅកាន់អធិការដ្ឋាននគរបាលខណ្ឌមានជ័យចាត់ការតាមផ្លូវច្បាប់៕