ភ្នំពេញ: ក្រោយពីបើកសវនការអស់ជាច្រើនលើករួចមក នៅព្រឹកថ្ងៃទី១ ខែវិច្ឆិកា ឆ្នាំ២០១៦ លោក ហេង សុណា ចៅប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសស្ត្រីជនជាតិម្នាក់ ឈ្មោះ ជិន ហាយយាន និងបុរសជនជាតិខ្មែរម្នាក់ឈ្មោះ លី ធៀមឆាយ ហៅ គឹម ឆាយ ដាក់ពន្ធនាគារកំណត់រយ:ពេលក្នុងម្នាក់ ២៥ឆ្នាំ និងពិន័យជាប្រាក់ក្នុងម្នាក់ចំនួន ៥០លានរៀលចូលជាថវិការដ្ឋ ក្រោមបទចោទប្រកាន់ ជួញដូរដោយខុសច្បាប់នូវសារធាតុញៀន ប្រព្រឹត្តនៅក្នុងបន្ទប់លេខ៥០៧ សណ្ឋាគារសុខា សង្កាត់ជ្រោយចង្វា ខណ្ឌជ្រោយចង្វារ កាលពីអំឡុងថ្ងៃទី៣ ដល់ថ្ងៃទី១១ ខែកុម្ភ: ឆ្នាំ២០១៦ យោងតាមមាត្រា ៤០ នៃច្បាប់ស្តីពី ការត្រួតពិនិត្យគ្រឿងញៀន។

សូមបញ្ជាក់ថា ជនជាប់ចោទជាជនជាតិចិនឈ្មោះ ជិន ហាយយាន បានស្រែកទ្រហោយំយ៉ាងខ្លាំងនៅក្នុងសវនាការដោយបដិសេធថា នាងមិនបានជូញដូរគ្រឿងញៀនដូចការចោទប្រកាន់នោះទេ ហើយនាងសម្រេចប្តឹងឧទ្ធរណ៍។

ដោយឡែកជនជាប់ចោទឈ្មោះ លី ធៀមឆាយ ហៅ គឹម ឆាយ មិនទាន់ប្រាកដថានឹងប្តឹងឧទ្ធរណ៍ឬក៏អត់នោះទេ។

គួររំឭកថា ជនជាប់ចោទទាំង២នាក់ត្រូវបានសមត្ថកិច្ចនៃការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលរាជធានីភ្នំពេញ ឃាត់ខ្លួនកាលពីថ្ងៃទី៣ ខែកុម្ភ: ឆ្នាំ២០១៦ នៅសណ្ឋាគារសុខា ខណ្ឌជ្រោយចង្វារ ដកហូតបានគ្រឿងញៀនប្រភេទមេតំហ្វេតមីន មួយចំនួន។

ក្រោយមកទៀតសមត្ថកិច្ចបានស្រាវជ្រាវចាប់បានបក្ខពួកជិត១០នាក់ទៀត និងដកហូតបានគ្រឿងញៀនជាម្សៅក្រាម ប្រភេទមេតំហ្វេតាមី ចំនួន ប្រមាណជា ជាង៤គីឡូក្រាម នេះបើយោងតាមការបញ្ជាក់របស់លោក អ៊ីវ ភារិទ្ធ ប្រធានការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលរាជធានីភ្នំពេញ៕