ផ្ទះ ព័ត៌មានជាតិ ជាប់គុកមិនរាង...

ជាប់គុកមិនរាង ចេញមកវិញនៅតែលក់ថ្នាំញៀនដដែល ត្រូវសមត្ថកិច្ចចាប់ជាប់

0

ព្រះសីហនុ: នៅ​យប់ថ្ងៃ​ទី២ ខែវិច្ឆិកា ឆ្នាំ២០១៦​កន្លងទៅនេះ សមត្ថកិច្ច​នគរបាលខេត្ត​ សហការជាមួយកម្លាំងនគរបាលក្រុងព្រះសីហនុ បានបង្រ្កាបមុខសញ្ញាលក់​ចែកចាយថ្នាំញៀន​១ករណី នៅចំណុចក្រុមទី៨ ភូមិ២ សង្កាត់លេខ៤ ​ក្រុងព្រះសីហនុ។

លោកវរសេនីយ៍ឯក​ស៊ុន សុផាត​ស្នងការរងទទួល​ផែនកណ្តាលនគរបាល​ប្រឆាំងបទល្មើសបានឲ្យដឹងថា ប្រតិបត្តិការនេះ សមត្ថកិច្ចបានឃាត់ជនសង្ស័យ​ចំនួន២នាក់ ទី១.ឈ្មោះស៊ឹម ដែន ឬ ឌី ស៊ីថា(ហៅរ៉ា) ភេទប្រុស ​អាយុ៣៩​ឆ្នាំ មុខរបរមិនច្បាស់លាស់ មានទីលំនៅភូមិប្រាល ឃុំតានី ស្រុកអង្គរ​ជ័យ ខេត្តកំពត និងទី២.ឈ្មោះលីស្រីពៅ(ហៅម៉ីឡាង) ភេទស្រី អាយុ៣២ឆ្នាំ ជនជាតិវៀតណាម មុខរបរ​មិនច្បាស់លាស់ ស្នាក់នៅផ្ទះ​ជួលសង្កាត់លេខ២ ក្រុង-ខេត្តព្រះសីហនុ​។ ចំណែក វត្ថុតាងដកហូតបាន ថ្នាំញៀនប្រភេទមេតំហ្វេ​តាមីនចំនួន៧​កញ្ចប់ និងទូរសព្ទដៃ១គ្រឿង។

លោកបានបន្ថែមថា ជនសង្ស័យឈ្មោះស៊ុម ដែន ជាមុខសញ្ញា​ចាស់ធ្លាប់ជាប់ពន្ធនាគារ ពីបទជួញដូរថ្នាំ​ញៀន កាលពីជាង១ឆ្នាំមុន តែជននេះមិនរាងចាល ពេលចេញពីពន្ធនាគារវិញនៅបន្ត ធ្វើសកម្មភាពល្មើសដដែល។ ហើយប្រតិបត្តិការបង្ក្រាបអំពើលក់​ចែកចាយថ្នាំញៀន​នេះ ដោយមានការបញ្ជាណែនាំផ្ទាល់​ពី ឯកឧត្តម​ ឧត្តម​សេនីយ៍ទោ​ជួន ណា​រិន្ទស្នងការ​នគរបាលខេត្តព្រះសីហនុផងដែរ។

បច្ចុប្បន្ន ជនសង្ស័យទាំង២នាក់និងវត្ថុតាង ត្រូវបានសមត្ថកិច្ចបញ្ជូនទៅកាន់ស្នងការនគរបាលដើម្បីកសាងសំណុំរឿងតាមនីតិវិធីច្បាប់៕

គ្រឿងញៀន

គ្រឿងញៀន

គ្រឿងញៀន