ផ្ទះ ព័ត៌មានជាតិ លោក ហុង សុខហួ...

លោក ហុង សុខហួរ ត្រូវតុលាការសម្រេចដាក់ពន្ធនា​គារ៧ឆ្នាំ

0

ភ្នំពេញ: នៅរសៀលថ្ងៃទី៧ ខែវិច្ឆិកា ឆ្នាំ២០១៦នេះ លោក រស់ ពិសិដ្ឋ ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសលោក លោក ហុង សុខហួរ សមាជិកព្រឹទ្ធសភា គណបក្ស សម រង្ស៊ី  ដាក់ពន្ធនាគារកំណត់រយ:ពេល៧ឆ្នាំ ក្រោមបទចោទប្រកាន់ពីបទក្លែងបន្លំ ឯកសារសាធារណ: បទប្រើប្រាស់ឯកសារសាធារណ:ក្លែង និងបទ ញុះញង់ បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ករណីការក្លែងសន្ធិសញ្ញា ព្រំដែនកម្ពុជា-វៀតណាម ឆ្នាំ១៩៧៩ ត្រង់មាត្រា៤ និងយក ឯកសារក្លែងនោះទៅបង្ហោះលើទំព័រហ្វេសប៊ុករបស់ លោក សម រង្ស៊ី ប្រព្រឹត្តកាលពីថ្ងៃទី១២ និង១៣ ខែសីហា ឆ្នាំ២០១៥ យោងតាមមាត្រា ៦២៩ មាត្រា ៦៣០ និង មាត្រា ៤៩៥ នៃក្រមព្រហ្មទណ្ឌ។

នៅក្នុងសវនាការប្រកាសសាលក្រមនេះ មិនមានវត្តលោក ហុង សុខហួរ និងមេធាវីការពារសិទ្ធិរបស់លោក ហុង សុខហួរ នោះទេ ដោយក្រឡាបញ្ជីសវនាការបានអះអាងថា ការអវត្តមាននោះ មិនមានមូលហេតុបញ្ជាក់មកតុលាការនោះទេ។

សូមបញ្ជាក់ថា នៅក្នុងសវនាការកាលពីថ្ងៃទី២៦ ខែតុលា ឆ្នាំ២០១៦កន្លងទៅ តុលាការធ្វើការសាកសួរដេញដោលតែលើកម្លាំងសមត្ថកិច្ចដើម្បីដាក់បន្ទុកលើជនជាប់ចោទ ខណ:លោក ហុង សុខហួរ បានស្នើឱ្យតុលាការអញ្ជើញអ្នកជំនាញអំពីសន្ធិសញ្ញាមកពន្យល់អង្គសវនាការ ដើម្បីបង្ហាញនៅការពិត។

ដោយឡែកក្រុមមេធាវីការពារសិទ្ធិឱ្យលោក ហុង សុខហួរ បានថ្លែងសន្និដ្ឋានថា តំណាងអយ្យការបានចោទប្រកាន់កូនក្តីរបស់ពួកគេ ដោយគ្មានមូលដ្ឋានច្បាប់ និងគ្មានភស្តុតាងគ្រប់គ្រាន់នោះទេ ខណ:ដែលតំណាងអយ្យការនៅតែតម្គល់ការចោទប្រកាន់ដូចដើម។

លោក សុន ឆ័យ ប្រធានអ្នកតណាងរាស្ត្រគណបក្សង្គ្រោះជាតិបានថ្លែងប្រាប់ក្រុមអ្នកសារព័ត៌មានថា លោក ហុង សុហួរ នឹងប្តឹងឧទ្ធរណ៍ប្រឆាំងសាលក្រមសម្រេចរបស់តុលាការក្រុងភ្នំពេញនាពេលនេះ ដោយសារតែសេចក្តីសម្រេចនេះ ហាក់មិនបានផ្តល់យុត្តិធម៌ដល់រូបលោក។

គួររំលឹកថា លោក ហុង សុខហួរ ត្រូវបានកម្លាំងសមត្ថកិច្ចឃាត់ខ្លួន កាលពីព្រឹកថ្ងៃទី១៥ ខែសីហា ឆ្នាំ២០១៥ នៅផ្ទះរបស់លោក យន្ត ថា រ៉ូ អ្នកតំណាងរាស្ត្រ មណ្ឌលខេត្តបន្ទាយមានជ័យរបស់គណបក្សសង្គ្រោះជាតិ នៅក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។ ក្រោយមកលោក ហុង សុខហួរ ត្រូវបានកម្លាំងសមត្ថកិច្ច បញ្ជូនខ្លួនទៅតុលាការនៅរសៀលថ្ងៃដដែល ដើម្បីបន្តនីតិវិធី៕

photo_2016-10-25_09-58-16

Loading...