ភ្នំពេញ: នគរបាលខណ្ឌច្បារអំពៅបានឃាត់ខ្លួនស្ត្រីម្នាក់ ពាក់ព័ន្ធករណីលួចពូកតែមិនសម្រេច កាលពីវេលាម៉ោង១១និង៣០នាទី ថ្ងៃទី១៥ ខែវិច្ឆិកា ឆ្នាំ២០១៦ ត្រង់ចំណុចសិប្បកម្មធ្វើពូក យីហោម៉ីស៊ីម ទីតាំងផ្ទះគ្មានលេខ ផ្លូវបេតុង ភូមិមិត្តភាព សង្កាត់ព្រែកឯង ខណ្ឌច្បារអំពៅ។

សមត្ថកិច្ចបានឲ្យដឹងថា ម្ចាស់ពូកមានឈ្មោះ កាង យូហេង ភេទប្រុស អាយុ៣៤ឆ្នាំ ជនជាតិខ្មែរ មុខរបរលក់ដូរ ស្នាក់នៅភូមិមិត្តភាព សង្កាត់ព្រែកឯង ខណ្ឌច្បារអំពៅ។ រីឯជនសង្ស័យឃាត់ខ្លួនបានមានឈ្មោះ គឹម ឡៃសៀក ភេទស្រី អាយុ២១ឆ្នាំ ជនជាតិខ្មែរ មុខរបរមិនពិប្រាកដ ស្នាក់នៅភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាល។

សមត្ថកិច្ចបានបន្តថា កាលពីថ្ងៃទី១៥ ខែវិច្ឆិកា ឆ្នាំ២០១៦ ម៉ោង១១និង៣០នាទី ជនសង្ស័យមានគ្នា៣នាក់ ឈ្មោះ រុន ភេទប្រុស ឈ្មោះ ផាត ភេទប្រុស និងឈ្មោះ គឹម ឡៃសៀក ភេទស្រី បានជិះម៉ូតូ១គ្រឿង ម៉ាកC100កូរ៉េ ពណ៌ក្រហម មិនចាំស្លាកលេខ មកឈប់នៅមុខសិប្បកម្មខាងលើ រួចជនសង្ស័យឈ្មោះ រុន និងឈ្មោះផាត បានផ្លោះរបងចូលទៅខាងក្នុងដើម្បីលួចពូក ពេលកំពុងធ្វើសកម្មភាពក៏ត្រូវសន្តិសុខឃើញទាក់ទងប្រាប់ម្ចាស់ផ្ទះ និងរាយការណ៍មកសមត្ថកិច្ចឲ្យចុះទៅដល់កន្លែងកើតហេតុ ហើយឃាត់ខ្លួនបានជនសង្ស័យម្នាក់ឈ្មោះ គឹម ឡៃសៀក ជាអ្នកមើលផ្លូវ ចំណែកឈ្មោះ រុន និងឈ្មោះ ផាត បានជិះម៉ូតូគេចខ្លួនបាត់។

បច្ចុប្បន្ន ជនសង្ស័យឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌច្បារអំពៅ ដើម្បីចាត់ការតាមនីតិវិធីច្បាប់៕