ភ្នំពេញ: ពាក្យចាស់ពោលថាល្បែងតែងវិនាស ជាក់ស្ដែងជនសង្ស័យម្នាក់សង្ស័យចាញ់ល្បែងអស់លុយបែកគំនិតឆ្លៀតឱកាសទៅលួចស្ករស ចំនួន២បាវ ម្ចាស់ចេញមកទាន់ស្រែកផ្អើលដេញចាប់បានភ្លាមៗ កាលពីវេលាម៉ោង២និង០៥នាទីរសៀលថ្ងៃទី១៦ ខែវិច្ឆិកា ឆ្នាំ២០១៦ ស្ថិតនៅតាមផ្លូវបេតុងភូមិក្បាលដំរីសង្កាត់កាកាបខណ្ឌពោធិ៍សែនជ័យ។

ជនសង្ស័យមានឈ្មោះ ហេង គៀ ភេទប្រុស អាយុ៣០ឆ្នាំ មុខរបរបើកបររថយន្ត និងលក់គុយទាវ ស្នាក់នៅផ្ទះជួលភូមិដីថ្មី សង្កាត់ភ្នំពេញថ្មី ខណ្ឌសែនសុខ មានស្រុកកំណើតភូមិដួងចិត្ត ឃុំព្រែកដំបង ស្រុកមុខកំពូល ខេត្តកណ្តាល។

ជនរងគ្រោះមានឈ្មោះ រ៉ន វិចិត្រ ភេទប្រុសអាយុ៣៧ឆ្នាំ ជាម្ចាស់ដេប៉ូយ៉ីហោ សោភ័ណ្ឌ រស់នៅផ្ទះកើតហេតុខាងលើ។ ចំណែកស្ករសដែលជនសង្ស័យលួចយកចំនួន២បាវ ស្មើ៦៨ដុល្លារ។

ជនសង្ស័យបានសារភាពថា មុនពេលកើតហេតុ ជនសង្ស័យត្រូវម្តាយឲ្យលុយ៧០ដុល្លាទៅទិញស្ករសយកមកសម្រាប់លក់គុយទាវ តែផ្ទុយទៅវិញជនសង្ស័យបែរជាទៅលេងល្បែងជល់មាន់ ចាញ់អស់លុយ កាលពីវេលាម៉ោង១១ព្រឹកថ្ងៃទី១៦ ខែវិច្ឆិកា មិនដឹងរកលុយឯណាទិញស្ករសឲ្យម្តាយវិញ ទើបជិះម៉ូតូ តាមផ្លូវដល់ចំណុចខាងលើ ប្រទះឃើញ រ៉ឺម៉កម៉ូតូមួយគ្រឿងដឹកសុទ្ធតែស្ករស ចតមុខដេប៉ូលក់ឥវ៉ាន់ នឹកថារួចខ្លួនហើយ ឆ្លៀតពេលមិនឃើញម្ចាស់ ក៏លើកស្ករសចំនួន២បាវដាក់លើម៉ូតូខ្លួន ម៉ាកហុងដា សេ១២៥ សេរី២០១៦ ពណ៌ខ្មៅ ពាក់ស្លាកលេខ ភ្នំពេញ 1FR-6144 បំរ៉ុងជិះចេញស្រាប់តែម្ចាស់ចេញមកទាន់ ស្រែកផ្អើលអ្នកជិតខាងដេញចាប់បានភ្លាមៗ។

តាមប្រភពពីបុរសរងគ្រោះបានឲ្យដឹងថា មុនកើតហេតុគាត់ទិញស្ករសពីក្រុមហ៊ុនចំនួន១តោន ដឹកតាមរ៉ឺម៉កម៉ូតូ ផ្ទាល់ខ្លួន មកចតមុខផ្ទះ ដោយកម្មកររវល់តែហូបបាយ ស្រាប់តែមើលឃើញតាមរយ:កាម៉េរ៉ាសុវត្តិភាព ឃើញជនសង្ស័យលើកយកបាវស្ករចំនួន២បាវ ដាក់លើម៉ូតូជិះចេញ ឃើញទាន់ស្រែកឲ្យ ពលរដ្ឋក្បែរខាងនាំគ្នាព័ទ្ធចាប់បានភ្លាមៗតែម្ដង។

ជនសង្ស័យក្រោយពីឃាត់ខ្លួនបានប្រគល់ឲ្យនគរបាលប៉ុស្តិ៍កាកាបនាំទៅសាកសួរ កសាងសំណុំរឿងចាត់ការទៅតាមនីតិវិធី៕