ភ្នំពេញៈ គ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីរថយន្តសាំយ៉ុង មួយគ្រឿង បើកបរខ្វះការប្រុងប្រយ័ត្ន និងការវ៉ាប្រជែងបានបើកបុកម៉ូតូម៉ាកវ៉េវ ដែលកំពុងបើកបរដោយលោកតាវ័យចំណាស់ម្នាក់ កំពុងជិះឆ្លងផ្លូវយ៉ាងពេញទំហឹង អូសម៉ូតូ២០ម៉ែត្រ បណ្តាលឲ្យអ្នកបើកបរម៉ូតូស្លាប់ភ្លាមៗមួយបប្រិចភ្នែកយ៉ាងអាណោចអាធ័ម។

គ្រោះថ្នាក់ដ៏រន្ធត់នេះ បានកើតឡើងកាលពីវេលាម៉ោង៦និង៣០នាទីព្រឹក ថ្ងៃទី១៩ ខែវិច្ឆិកា ឆ្នាំ២០១៦ នៅត្រង់ចំណុចកំពង់ចម្លងកោះដាច់ (ខ្ទរ) តាមបណ្តោយផ្លូវជាតិលេខ៦ ស្ថិតក្នុងក្រុម៩ ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

សមត្ថកិច្ចបានឲ្យដឹងថា លោកតាវ័យចំណាស់ម្នាក់ ដែលត្រូវរថយន្តបុកស្លាប់នោះឈ្មោះ សុខ ប៉ូច អាយុ៧២ឆ្នាំ មុខរបរ នៅផ្ទះ មានទីលំនៅភូមិខ្ទរ សង្កាត់ព្រែកលៀប ខណ្ឌជ្រោយចង្វារ។ ចំណែកឯម្ចាស់រថយន្តបង្កឈ្មោះ ប៉ា ទិត្យគន្ធា ភេទប្រុស មានទីលំនៅផ្ទះលេខ7E ផ្លូវលេខ៥៩៨ ហៅផ្លូវជាសុផារ៉ា សង្កាត់ភ្នំពេញថ្មី ខណ្ឌសែនសុខ។

ប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញលោកតាវ័យចំណាស់ម្នាក់ បើកបរម៉ូតូ មួយគ្រឿង ម៉ាកវ៉េវអេស ពណ៌ខ្មៅ ពាក់ស្លាកលេខ ភ្នំពេញ 1BQ-1743 ជិះតាមបណ្តោយផ្លូវខាងលើ លុះបានមកដល់ចំណុចកើតហេតុ លោកតាបានបត់ឆ្លងផ្លូវ ស្របពេលនោះ ស្រាប់តែមានរថយន្តបង្ក ម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2AB-7946 ដែលមានមនុស្សជិះក្នុងរថយន្តជាង ១០នាក់ បើកបរដោយបុរសម្នាក់ក្នុងល្បឿនយ៉ាងលឿនវ៉ាប្រជែងជាមួយនឹងរថយន្ត មួយគ្រឿងផ្សេងទៀត មិនប្រយ័ត្នក៏បុកជាមួយម៉ូតូជនរងគ្រោះដែលកំពុងជិះឆ្លងផ្លូវយ៉ាងពេញទំហឹង បណ្តាលឲ្យម៉ូតូជនរងគ្រោះគៀបជាប់ខាងក្រោមរថយន្តអូស២០ម៉ែត្រ ស្លាប់ភ្លាមៗយ៉ាងអាណោចអាធ័ម ក្រោយពីកើតហេតុ ម្ចាស់រថយន្តបង្កបានរត់គេចខ្លួនបាត់ដោយសុវត្ថិភាព។

ក្រោយពីកើតហេតុ សមត្ថកិច្ចមូលដ្ឋានបានធ្វើការទំនាក់ទំនងទៅការិយាល័យនគរបាលចរាចរជើងគោក រាជធានីភ្នំពេញឲ្យចុះមកធ្វើការវាស់វែង និងនាំយករថយន្តបង្ក និងម៉ូតូយកទៅរក្សាទុកនៅការិយាល័យនគរបាលចរាចរជើងគោករាជធានីភ្នំពេញ ដើម្បីរង់ចាំធ្វើការដោះស្រាយគ្នាតាមផ្លូវច្បាប់ ចំណែកឯសាកសពត្រូវសមត្ថកិច្ចប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណីនៅឯផ្ទះ៕

https://youtu.be/18rNWEXRiJk