រតនគិរី: កម្លាំងនគរបាលសេដ្ឋកិច្ចខេត្ត សហការជាមួយនគរបាលក្រសួងមហាផ្ទៃ
នៅវេលាម៉ោង២ និង៣០នាទី រំលងអធ្រាត ឈានចូលថ្ងៃទី២០ ខែវិច្ឆិកានេះ នៅតាមកំណត់ផ្លូវជាតិលេខ៧៨ ស្ថិតនៅភូមិសោមទ្រព្យ ឃុំសោមគល់ ស្រុកអូរយ៉ាដាវ ខេត្តរតនគិរី រថយន្តកូរ៉េចំណុះ៥តោន ពណ៌ស ពាក់ស្លាកលេខក្រចេះ 3A-0410 ត្រូវបានធ្វើការឃាត់ និងបង្រ្កាប។

បើតាមលោក នៅ តារា ប្រធានការិយាល័យប្រឆាំងបទល្មើស នៃស្នងការនគរបាលខេត្ត បានឲ្យដឹងនៅព្រឹកថ្ងៃទី២០ ខែវិច្ឆិកានេះថា រថយន្តដឹកឈើមួយគ្រឿនេះ មានសេចក្ដីរាយការណ៍ពីប្រជាពលរដ្ឋ ទើបឈានទៅធ្វើការឃាត់ និងត្រួតពិនិត្យក៏ឃើញឈើពេញមួយរថយន្ត ។

សូមបញ្ជាក់ថា ម្ចាស់ឈើ មិនត្រូវបានស្គាល់អត្តសញ្ញាណនោះទេ ក្រោយពីសមត្ថកិច្ចធ្វើការឃាត់រថយន្ត តាកុងទ្បានក៏បានបើកទ្វាររថយន្តរត់គេចខ្លួនបាត់ទៅ ដោយបន្សល់ទុករថយន្តនៅនឹងកន្លែង។

សម្រាប់រថយន្តនេះផងដែរ ត្រូវបានយកមករក្សាទុកនៅស្នងការរដ្ឋានគរបាលខេត្តរតនគិរីទាំងយប់ រួចព្រឹកថ្ងៃទី២០ សមត្ថកិច្ចនគរបាលខេត្ត កំពុងធ្វើកំណត់ហេតុទៅឲ្យជំនាញរដ្ឋបាលព្រៃឈើចាត់ការបន្ត៕