ព្រៃវែង: គ្រោះថ្នាក់ចរាចរណ៍មួយបានកើតឡើងរវាងរថយន្តម៉ាក ហ៊ីណូ ពណ៌ទឹកប៉ិច បានបត់ឆ្វេងបំណងចូលជញ្ជីងថ្លឹងរថយន្ត គាប់ជួនម៉ូតូមួយគ្រឿងធ្វើដំណើរបញ្ច្រាស់ទិសគ្នា ក៏បុកត្រង់ផ្នែកខាងក្រោយនៃរថយន្តបណ្តាលឲ្យអ្នកជិះម៉ូតូចំនួន ០២នាក់ រងរបួសធ្ងន់។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៧ និង២០នាទីយប់ ថ្ងៃទី២១ ខែវិច្ឆិកា ឆ្នាំ២០១៦ នៅលើផ្លូវជាតិលេខ៨ ចន្លោះគីឡូម៉ែត្រលេខ៦៩ និងលេខ៧០ ភូមិព្រហ្ម ឃុំព្រៃផ្តៅ ស្រុកពារាំង ខេត្តព្រៃវែង។

សមត្ថកិច្ចបានឲ្យដឹងថា នៅវេលាម៉ោងកើតហេតុខាងលើ គេបានឃើញរថយន្តមួយគ្រឿងម៉ាក ហ៊ីណូ ពណ៌ទឹកប៉ិច ពាក់ស្លាកលេខកំពង់ធំ 3A-1109 បើកបរក្នុងទិសដៅពីលិចទៅកើត លុះមកដល់ចំណុចកើតហេតុ រថយន្តបានបត់ឆ្វេងចូលស្ថានីយ៍ថ្លឹងរថយន្ត ស្របពេលនោះក៏មានម៉ូតូមួយគ្រឿងម៉ាក់សង់សេ១២៥ ពាក់ស្លាកលេខ ព្រៃវែង 1F-7691 ជិះគ្នា០២នាក់ មិនស្គាល់អត្តសញ្ញាណពីកើតទៅលិច បានជ្រុលទៅបុកនឹងកន្ទុយរថយន្តបណ្តាលឲ្យរងរបួសធ្ងន់ទាំងពីរនាក់តែម្តង។

ក្រោយកើតហេតុ ជនរងគ្រោះត្រូវបានគេបញ្ជូនទៅសង្គ្រោះនៅក្លីនិកឯកជន ស្វាយអន្ទរ ចំណែកវត្ថុតាង រថយន្ត និងម៉ូតូ រក្សាទុកនៅបរិវេណស្ថានីយ៍ថ្លឹងរថយន្តសិន ដើម្បីទុកដោះស្រាយតាមនីតិវិធីច្បាប់៕