កណ្តាល: គ្រោះថ្នាក់ចរាចរណ៍មួយបង្កឡើងដោយរថយន្តមួយគ្រឿងម៉ាក ហ្វុយហ្សូ បើកបរក្នុងល្បឿនលឿនខ្វះការប្រុងប្រយត្ន័ទៅបុកម៉ូតូឌ្រីមសេ១២៥ យ៉ាងពេញទំហឹងបណ្តាលឲ្យបុរសអ្នកបើកម៉ូតូដួលបោក្បាលស្លាប់ភ្លាមៗ កាលពីវេលាម៉ោង៨និង៤០នាទី យប់ថ្ងៃទី២១ ខែវិច្ឆិកា ឆ្នាំ២០១៦ ស្ថិតនៅចំណុច ចន្លោះគីឡូម៉ែត្រ២៨-២៩ ក្នុងភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល។

ជនរងគ្រោះដែលត្រូវរថយន្តបង្កបុកស្លាប់ខាងលើនេះ មានឈ្មោះ ហ៊ុន ចម្រើន ភេទប្រុស អាយុ២៨ឆ្នាំ ស្នាក់នៅភូមិជ្រោយដង ឃុំសំរោងធំ ស្រុកកៀនស្វាយ ខេត្តកណ្តាល។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញជនរងគ្រោះជិះម៉ូតូមួយគ្រឿងម៉ាក ឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AM-4382 តែម្នាក់ឯងក្នុងទិសដៅពីភ្នំពេញ ឆ្ពោះទៅអ្នកលឿង លុះបានមកដល់ចំណុចកើតហេតុ ស្រាប់តែមានរថយន្តម៉ាក ហ្វុយហ្សូ ពណ៌ស ពាក់ស្លាកលេខ ព្រះសីហនុ 3A-0704 ជាប្រភេទដឹកទំនិញ បើកបរក្នុងទិសដៅបញ្ច្រាសទិសគ្នាពីអ្នកលឿង ឆ្ពោះទៅភ្នំពេញ បានជ្រុលចង្កូតរថយន្តបុកចំមុខម៉ូតូយ៉ាងពេញទំហឹង បណ្តាលឲ្យអ្នកបើកម៉ូតូដួកបោលក្បាលស្លាប់ភ្លាមៗយ៉ាងអាណោចអាធ័ម ចំណែកអ្នកបើកបររថយន្តបង្ក នាំគ្នាបើកទ្វារថយន្តចុះរត់គេចខ្លួនបាត់ស្រមោល បន្សល់ទុករថយន្តបង្កនៅនឹងកន្លែងកើតហេតុ ។

ក្រោយពីកើតហេតុ សមត្ថកិច្ចនគរបាលចរាចរណ៍បានចុះមកធ្វើការពិនិត្យនិងវាស់វែងដល់កន្លែងកើតហេតុ ដោយបាននាំយករថយន្តបង្កនិងម៉ូតូជនរងគ្រោះ យកទៅរក្សាទុក នៅអធិការដ្ឋាននគរបាលស្រុកកៀនស្វាយ ដើម្បីរង់ចាំការដោះស្រាយ តាមនីតិវិធីច្បាប់៕

//youtu.be/Ep44EuPllMY