ភ្នំពេញ : ដោយសារស្ថានភាពនៅក្នុងប្រទសកម្ពុជាឡើងកម្ដៅខ្លាំងៗ ក្នុងរដូវប្រាំងនាពេលកន្លងមកថ្មីៗនេះ អាចអូសបន្លាយ ពេលវេលាបន្ត ទៀត ក្នុងឆ្នាំ២០១៦ ដែលនៅតំបន់ខ្លះពេល ថ្ងៃកម្តៅឡើងរហូតដល់៤២ឬ៤៣អង្សាសេ។

ដើម្បីបង្ការទប់ស្កាត់ហានិភ័យ និងចៀសវាងជំងឺផ្សេងៗ ចំពោះសិស្សានុសិស្ស ដែលបណ្ដាលមកពីការឡើងកម្ដៅ ខ្យល់កន្ត្រាក់ ខ្យល់ព្យុះ និងសម្រួលដល់ពេលវេលារៀនសូត្រប្រចាំថ្ងៃរបស់សិស្ស ជាពិសេស សិស្សតូចៗ ក្នុងពេលឡើងកម្ដៅ ចាប់ពីខែឧសភា រហូតដល់ផុតរយ:ពេលក្ដៅខ្លាំងក្នុងឆ្នាំ២០១៦ ក្រសួងអប់រំ យុវជន និងកីឡា ធ្វើការណែនាំឲ្យអនុវត្តដល់គ្រប់គ្រឹះស្ថាន សិក្សាសាធារណ: ដូចខាងក្រោម ៖

ពេលព្រឹកចូលរៀននៅម៉ោង ៧:០០ ដល់ ១០:៣០ និងពេលរសៀល ១៣:៣០ ដល់ ១៧:០០ គ្រប់សាលាត្រូវត្រៀមទឹកសម្រាប់គ្រូ សិស្សប្រើប្រាស់ និងណែនាំឱ្យសិស្សយកទឹកឆ្អិនមកផឹក, ក្នុងមួយម៉ោងសិក្សាលោកគ្រូ អ្នកគ្រូ ត្រូវឱ្យសិស្សឈប់សម្រាក ឬ ចេញលេង រយ:ពេល១៥នាទី ពេលរៀនត្រូវបើកទ្វារ បង្អួចបន្ទប់រៀនឱ្យស្រឡះល្អ និងពេលចេញលេងឱ្យសិស្សលេងក្នុងម្លប់។

លើសពីនេះលោកស្នើឱ្យធ្វើរបាយការណ៍បូកសរុបប្រចាំខែ ពីស្ថានភាពសិក្សា ក្នុងរយ:ពេលឡើងកម្ដៅ និងរបាយការណ៍ ពិសេសក្នុងករណីមានប្រធានសក្តិ រួចផ្ញើជូនតាមឋានានុក្រមដើម្បីស្នើសុំអន្តរាគមន៍ ក្នុងករណីមានរលកកម្ដៅលើសប្រក្រតី ត្រូវទាក់ទងការិយាល័យអប់រំ យុវជន និងកីឡាក្រុង ស្រុក ខណ្ឌ និងមន្ទីរអប់រំ យុវជន និងកីឡារាជធានី ខេត្ត ដើម្បីសុំគោលការណ៍ និងវិធានការដោះស្រាយ។

ទាក់ទិននិងបញ្ហាប្តូរពេលវេលារបស់ក្រសួងអប់រំខាងលើនេះ មានការសារទរពី មាតា បិតា និងអាណាព្យាបាលសិស្ស ព្រោះថា ជាទូទៅគេសង្កេតឃើញនៅតាមសាលារៀន ក្នុងរាជធានីភ្នំពេញ ក៏ដូចជាតាមបណ្តាខេត្តមួយចំនួន មានទីតាំងនៅកណ្តាលវាល ពុំសូវមានដើមឈើឬម្លប់គ្រប់គ្រាន់សម្រាប់សិស្សចេញលេងទៅជ្រកនោះទេ ភាគច្រើនពួកគេនាំគ្នារត់លេងកណ្តាលថ្ងៃត្រង់តែម្តង។
បញ្ហានេះដែរ តាមការពិនិត្យពីអាណាព្យាបាលក៏បានឱ្យដឹងផងដែរថា ភាគច្រើនពុំសូវមានការយកចិត្តទុកដាក់ពីលោកគ្រូ អ្នកគ្រូប្រចាំថ្នាក់នោះទេ ពិសេសថ្នាក់ដឹកនាំសាលាមិនសូវគិតគូរពីសុខភាពកុមារនៅក្នុងរដូវក្តៅនោះឡើយ បណ្តែតបណ្តោយឱ្យមានលក់របស់របរគ្មានអនាម័យ ជាហេតុធ្វើឱ្យកុមានមានជំងឺក្អក និងរលាកបំពង់កស្ទើរគ្រប់គ្នា។

ឆ្លៀតពេលជាមួយគ្នានេះដែរ ឪពុក ម្តាយ និងអាណាព្យាបាលសិស្ស ក៏សុំស្នើឱ្យក្រសួងអប់រំ យុវជន និងកីឡា មានចំណាត់ការចុះត្រួតពិនិត្យការលក់ដូរចំណីអាហារ នៅតាមបណ្តាសាលារៀន ពិសេសសាលាបឋមសិក្សា ក្នុងរាជធានីភ្នំពេញតែម្តងគឺលក់ដូរមិនគិតពីសុខភាពកុមារគើយ។ ឧទាហរណ៍ដូចជា លក់តែជ្រក់ ១កែវ៥០០រៀល គឺគេកិនទឹកកក ច្របាច់ក្រូចឆ្មាលាយជាមួយទឹកស្ក ដួសលក់ ដូចចាក់ទឹកឆៅយកលុយ មិនគិតពីសុខភាពកុមារនោះទេ ធ្វើយ៉ាងណាឱ្យតែមានលុយដាក់ចូលហោប៉ៅខ្លួនឯង ហើយអ្នកលក់ក្នុងសាលាភាច្រើនគឺជាសាច់ញាតិលោកគ្រូ អ្នកគ្រូ និងថ្នាក់ដឹកនាំសាលាតែម្តង នៅមានសកម្មភាពលក់ដូរនំចំណីមួយចំនួនទៀតដែលគ្មានអនាម័យ បង្ករឱ្យប៉ះពាល់សុខភាពកុមារ៕