អាមេរិក: ប្រធានាធិបតីអាមេរិកជិតផុតអាណត្តិ លោក បារ៉ាក់ អូបាម៉ា នឹងថ្លែងសុន្ទរកថា បញ្ចប់តំណែងជាប្រធានាធិបតី រយ:ពេល៨ឆ្នាំរបស់ខ្លួន ក្នុងសេតវិមានដែលសុន្ទរកថានេះ នឹងបូកសរុបសមិទ្ធផលដែលសម្រេចបានរបស់លោក ក្នុងនាមជាប្រធានាធិបតីនៅថ្ងៃនេះ។ នេះបើតាមរយ:សារព័ត៌មាន CNN ចេញផ្សាយនៅថ្ងៃទី១១ ខែមករា ឆ្នាំ២០១៧ ។
យោងតាមទីប្រឹក្សាជាន់ខ្ពស់សេតវិមាន លោកស្រី Valerie Jarrett បានឲ្យដឹងថា លោកអូបាម៉ា និងសហការី កំពុងថ្លែងសុន្ទរកថា ដើម្បីបូកសរុបសមិទ្ធផល ដែលសម្រេចបានរបស់លោក អូបាម៉ា ក្នុងរយ:ពេល៨ឆ្នាំកន្លងមកនេះ ក្នុងនាមជាប្រធានាធិបតី។ សុន្ទរកថានេះ ក៏គ្រោងនឹងលើកទឹកចិត្តប្រជាពលរដ្ឋឲ្យចូលរួមតស៊ូ ដើម្បីប្រជាធិបតេយ្យរបស់ខ្លួនផងដែរ។
សុន្ទរកថានេះ បានធ្វើទ្បើងនៅយប់នេះនៅអាមេរិក ត្រូវនឹងម៉ោង ៩ព្រឹកនៅកម្ពជា ស្ថិតនៅឯមជ្ឈមណ្ឌលសន្និបាត McCormick Place ក្នុងទីក្រុង Chicago ដែលលោក អូបាម៉ា ចាត់ទុកដូចជាស្រុកកំណើតរបស់លោក។
ដំណើរទៅកាន់ទីក្រុង Chicago របស់លោក អូបាម៉ា នឹងក្លាយជាដំណើរចេញពីរដ្ឋធានី វ៉ាស៊ីនតោនចុងក្រោយបង្អស់ក្នុងនាមជាប្រធានាធិបតី ហើយក៏ជាពេលវេលាចុងក្រោយដែលលោកនឹងធ្វើដំណើរតាមយន្តហោះ Air Force One ផងដែរ។
សូមជំរាបថា ពិធីស្បថចូលកាន់តំណែង សម្រាប់ប្រធានាធិបតីជាប់ឆ្នោត លោក ដូណាល់ ត្រាំ នឹងប្រារព្ធឡើងនៅថ្ងៃទី២០ ខែមករាខាងមុខ ដែលលោកនឹងក្លាយជាប្រធានាធិបតីទី៤៥របស់អាមេរិក៕
មតិយោបល់