ចិន: មនុស្សសរុបចំនួន ១៧ នាក់ស្លាប់ និង ៣៧ នាក់ផ្សេងទៀត បានរងរបួស បន្ទាប់ពីរថយន្ត ៥៦គ្រឿងបុកគ្នាជាបន្តបន្ទាប់ នៅលើផ្លូវចេញពីទីក្រុងប៉េកាំង ទៅកាន់ទីក្រុងគុនមីង ភាគខាងជើងខេត្ត Shanxi ប្រទេសចិន កាលពីថ្ងៃច័ន្ទ។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២២ ខែវិច្ឆិកា ឆ្នាំ២០១៦។

គ្រោះថ្នាក់នេះ បានកើតឡើងនៅវេលាម៉ោង ៩ ព្រឹក ដោយសារតែអាកាសធាតុមានភ្លៀង និងព្រិលធ្លាក់ខ្លាំង ទើបបង្កផលលំបាកដល់អ្នកបើកបរ ក្នុងការមើលផ្លូវ។ អ្នករងរបួសទាំងនោះ កំពុងស្ថិតក្នុងស្ថានភាពប្រសើរជាងមុន បន្ទាប់ពីទទួលការព្យាបាល នេះបើយោងតាមអាជ្ញាធរមូលដ្ឋាន បានបញ្ជាក់ឲ្យដឹងនៅព្រឹកថ្ងៃអង្គារនេះ។

ក្នុងប្រតិបត្ដិការជួយសង្គ្រោះនេះ គឺមានការចូលរួមពីប៉ូលិសក្នុងតំបន់ អ្នកពន្លត់អគ្គិភ័យ វេជ្ជបណ្ឌិត និងក្រុមមន្ត្រីផងដែរ។

ខណ:នេះ ការស៊ើបអង្កេតពីមូលហេតុនៃគ្រោះថ្នាក់នេះ កំពុងចាប់ផ្ដើមដំណើរការ៕