អាមេរិក: ពិតជាគួរឲ្យភ្ញាក់ផ្អើលដែល Sasha Obama អាយុ ១៥ឆ្នាំ ត្រូវជាកូនស្រីពៅរបស់ប្រធានាធិបតីអាមេរិកលោក បារ៉ាក់ អូបាម៉ាបានធ្វើការងារក្រៅម៉ោង អំទ្បុងពេលវិស្សមកាលរដូវក្តៅ ដែលនាងបម្រើការនោះគឺ លើកម្ហូបឲ្យអតិថិជននៅភោជនីយដ្ឋានអាហារសមុទ្រ នៅរដ្ឋ Massachusetts សហរដ្ឋអាមេរិក។ នេះបើយោងតាមរយ: សារព័ត៌មាន theaustralian ចេញផ្សាយនៅថ្ងៃទី៧ ខែសីហា ឆ្នាំ២០១៦។

ភោជនីយដ្ឋានដែល Sasha កំពុងតែបម្រើការនោះ មានឈ្មោះថា Nancy’s ហើយក្នុងនោះ នាងត្រូវបានរៀនសូត្រពីសេវាកម្មនៅក្រុមហ៊ុន ទាំងការគិតលុយ ការរៀបចំតុសម្រាប់ភ្ញៀវ និងត្រៀមអាហារមុនពេលបើកដំណើការហាង។

ទាក់ទងនឹងសកម្មភាពនេះ សេតវិមានអាមេរិក មិនបានធ្វើអត្ថាធិប្បាយអ្វីឡើយ។ ប៉ុន្តែកន្លងមក ស្ត្រីទីមួយអាមេរិក លោកស្រី Michelle Obama ធា្លប់បាននិយាយថា «លោកស្រី និងលោកអូបាម៉ា មិនបានដាក់កំហិតដល់កូនស្រីទាំងពីរទេ ហើយលោកស្រី បានព្យាយាមឲ្យកូនៗរស់តាមបែបសាមញ្ញ ដែលអាចធ្វើទៅបាន»៕