លោក Luis Enrique អ្នកចាត់ការក្រុម Barcelona បាននិយាយថាដៃគូប្រជែង Real Madrid នៅតែធ្វើបានល្អដដែល បើទោះជាអត់មានវត្តមានរបស់ខ្សែបម្រើប្រយុទ្ធស្លាប Gareth Bale ក៏ដោយ។

ជំនួប El Clasico រវាងក្រុម Barcelona និង Real Madrid បានឈានចូលមកដល់ហើយនៅយប់នេះ វេលាម៉ោង១០:១៥នាទី។ ដោយក្រុមទាំងពីរ សុទ្ធតែមានសង្ឃឹមថាអាចនឹងឈ្នះរៀងខ្លួន ស្របពេលនៅលើតារាងគឺ Real Madrid កំពុងនាំមុខ Barcelona ៦ពិន្ទុរួចទៅហើយ។

Enrique អ្នកចាត់ការក្រុម Barcelona ថាគ្មានបញ្ហាទេសម្រាប់លោកនៅពេលលេងក្នុងដីខ្លួនឯង បើទោះជាចាញ់ពិន្ទុក្រុម Real Madrid ច្រើនក៏ដោយ ក៏លោកនៅតែជឿជាក់លើកូនក្រុមថានឹងលេងបានល្អ ហើយអាចទទួលបានជ័យជម្នះ។ ចំពោះទម្រង់របស់ក្រុមអធិរាជសវិញ គ្រូបង្វឹករូបនេះ គិតថាទោះជា Bale មិនបានចូលលេង ប៉ុន្តែក្រុមរបស់ Zidane នៅតែធ្វើបានល្អ ព្រោះកីឡាករពួកគេមានល្អច្រើន អាចចូលលេងជំនួសគ្នាបាន។

សូមបញ្ជាក់ថា El Clasico នៅយប់នេះ គឺពិតជាមានសារសំខាន់ណាស់សម្រាប់ក្រុម Barcelona ដើម្បីទាមទារយក៣ពិន្ទុ កាត់បន្ថយគម្លាតពី Real Madrid ។ យ៉ាងណាមិញបើងាកទៅមើលកំណត់ត្រា៦ប្រកួតចុងក្រោយវិញ ក្រុមទាំងពីរនេះឈ្នះគ្នា៣ម្ដងម្នាក់។ កីឡាករម្ចាស់ផ្ទះហាក់ដូចជាពេញជើងក្រោយពី Iniesta អាចចូលលេងវិញបាន ខណៈដែលក្រុមភ្ញៀវ Real Madrid អវត្តមាន៣នាក់ គឺBale, Morata និង Kroos៕