លោក Antonio Conte អ្នកចាត់ការក្រុម Chelsea បាននិយាយថា Pep Guardiola អ្នកចាត់ការក្រុម Manchester City គឺជាមនុស្សគ្រោះថ្នាក់បំផុតក្នុងចំណោមអ្នកចាត់ការក្លឹបនៅអង់គ្លេសទាំងអស់។

ជំនួប Man City និង Chelsea បានចូលមកដល់នៅវេលាម៉ោង៧:៣០នាទីយប់នេះហើយ ខណៈដែលលោក Conte មានការបារម្ភច្រើនចំពោះប្រកួតនេះ ព្រោះប៉ះជាមួយក្រុមខ្លាំងនិងមានអ្នកដឹកនាំល្អ។ អ្នកចាត់ការសញ្ជាតិអ៊ីតាលីបាននិយាយដូច្នេះថា៖“Pep ជាមនុស្សមានយុទ្ធសាស្ត្រល្អណាស់។ គាត់បានជោគជ័យច្រើនក្នុងអាជីពរបស់គាត់ មិនមែនតែនៅអេស្ប៉ាញទេ សូម្បីតែអាល្លឺម៉ង់ក៏ដូចគ្នា។ វាជារឿងពិបាកណាស់ ក្នុងការយកខ្ញុំទៅប្រៀបជាមួយគាត់ ខ្ញុំនឹងទុកឱ្យអ្នកទាំងអស់គ្នាជាអ្នកដាក់ពិន្ទុទៅចុះ ព្រោះខ្ញុំដឹងខ្លួនឯងច្បាស់”។

Chelsea បច្ចុប្បន្ន កំពុងឈរនៅកំពូលតារាងលីគកំពូលអង់គ្លេស ដោយមាន៣១ពិន្ទុ ចំណែកឯក្រុម Manchester City វិញ ឈរនៅលេខ៣មាន៣០ពិន្ទុ។ ដូច្នេះប្រកួតល្ងាចនេះ ពិតជាសំខាន់ខ្លាំងមែនទែនសម្រាប់ក្រុមទាំងពីរ ត្បិតអី Liverpool នៅចំណាត់ថ្នាក់លេខ២នោះ ក៏មាន៣០ពិន្ទុដែរ៕