ព័ត៌មានកីឡា

World Cup ​អាច​នឹង​ប្រើ​រូបមន្ត​ថ្មី មាន​៤៨​ក្រុម​ចូល​រួម ​បែងចែក​ជា​១៦​ពូល

បើ​តាម​លោក Gianni Infantino ​ប្រធាន FIFA ​បាន​បញ្ជាក់​ថា​បច្ចុប្បន្ន​នេះ​ក្រុម​ការងារ​របស់​លោក​កំពុង​តែ​ពិភាក្សា​រឿង​ផ្លាស់​ប្ដូរ​ទម្រង់​ប្រកួត​និង​កម្មវិធី​ខ្លះ​ៗ​នៅ​ព្រឹត្តិការណ៍ FIFA World Cup ​ដោយ​អាច​នឹង​បន្ថែម​ក្រុម​ខ្លះ។

ដោយ​ការ​បន្ថែម​នោះ ​អាច​ប្ដូរ​ពី​៣២​ក្រុម​ដូច​រាល់​ដង ​ទៅ​ជា​៤៨​ក្រុម​វិញ ​ដើម្បី​ឱ្យ​ការ​ប្រកួត​មាន​រយ:​ពេល​យូរ​បន្តិច។ ​ខណ:​ដែល​ការ​បែងចែក​ពូល​វិញ ​គឺ​តម្រូវ​ឱ្យ​មាន​រហូត​ដល់​ទៅ​១៦​ពូល ​ដោយ​១​ពូល ​មាន​តែ​៣​ក្រុម​ប៉ុណ្ណោះ។ ដោយ​ការ​បន្ថែម​រហូត​ដល់​១៦​ក្រុម​នេះ គឺ​ដោយសារ​តែ​មើល​ឃើញ​ថា​សមត្ថភាព​ប្រទេស​ដទៃ​ទៀត ក៏​អាច​ចូល​លេង​ក្នុង​ព្រឹត្តិការណ៍​នេះ​បាន​ដែរ ​ហើយ​ប្រសិន​បើ​ពួកគេ​បាន​លេង ​ក៏​រឹត​តែ​ធ្វើ​ឱ្យ​កម្មវិធី​កាន់​តែ​ជក់ចិត្ត​ថែម​ទៀត។

ការ​សម្រេច​យ៉ាងណា​នោះ ​នៅ​មិន​ទាន់​ប្រាដក​១០០​%​ទេ ​ប៉ុន្តែ​ក្រុម FIFA ​នឹង​ត្រូវ​ធ្វើ​ការ​ប្រជុំ​នៅ​ទីក្រុង Zurich ​នា​ថ្ងៃ​ទី​៩​ដល់​១០​ខែមករា​ឆ្នាំ​២០១៧​ខាង​មុខ​នេះ។ ខណ:​ដែល​ការ​ប្រកួត​បែងចែក​ជា​១៦​ពូល ១​ពូល​មាន​៣​ក្រុម​​នោះ​ទៀត​សោត គឺ​ក្នុង​ពូល​ទាំង​១៦​នោះ ក្រុម​មាន​ចំណាត់​ថ្នាក់​ទី​១​និង​ទី​២ ​ត្រូវ​ឡើង​ទៅ​វគ្គ​៣២​ក្រុម​ចុង​ក្រោយ ​ហើយ​ដល់​វគ្គ​៣២​ក្រុម​ចុង​ក្រោយ​នេះ ​គឺ​ប្រើ​រូបមន្ត​ចាស់​ដដែល​ទៀត៕

មតិយោបល់