ខ្សែបម្រើមិនសួវបានបង្ហាញខ្លួន Henrikh Mkhitaryan បានរកឃើញគ្រាប់បាល់ដំបូងរបស់គេហើយ កាលពីយប់មិញនេះ ពោលគឺក្នុងការប្រកួតដែលបិសាចក្រហម Manchester United ឈ្នះក្រុម Zorya ២-០។
Mkhitaryan ផ្លាស់ពីក្រុម Dortmund មក Old Trafford ក្នុងតម្លៃខ្លួន ២៦,៣លានផោន កាលពីរដូវក្ដៅកន្លងទៅនេះ ប៉ុន្តែរូបគេហាក់មិនសួវបានចូលលេងនោះទេ និងមានរឿងរ៉ាវជាច្រើនជាមួយអ្នកចាត់ការ Jose Mourinho ។ យ៉ាងណាមិញ ក្រោយពីបានចូលលេងជាប់ប៉ុន្មានប្រកួតមកនេះ ឃើញថាខ្សែបម្រើរូបនេះ ធ្វើបានល្អមែនទែន ដោយបានបញ្ជូនបាល់ឱ្យមិត្តរួមក្រុមស៊ុតជាញឹកញាប់ ហើយកាលពីយប់មិញរកបាន១គ្រាប់ថែមទៀត។
ជ័យជម្នះលើក្រុម Zorya ២-០ នេះ ធ្វើបានដោយ Mkhitaryan ១គ្រាប់និងខ្សែប្រយុទ្ធវ័យជ្រេ Zlatan ១គ្រាប់។ មួយវិញទៀតការរកបាន៣ពិន្ទុនេះ ក៏បានធ្វើឱ្យក្រុមបិសាចក្រហមឡើងទៅវគ្គ៣២ក្រុមចុងក្រោយនៃពានរង្វាន់ Europa League ផងដែរ៕
មតិយោបល់